नइ बाल पुरस्कार नौ जनालाई
काठमाडौं, २०७६ फागुण २१ गते बुधबार
नइ प्रकाशनले आआफ्ना क्षेत्रका उल्लेखनीय काम गर्ने नौ जना बालबालिकालाई २०७६ सालको ‘नइ देरूनीखपू बाल पुरस्कार’ समर्पण गर्ने घोषणा गरेको छ ।
नइ प्रकाशनले भारतमा सम्पन्न विश्व बाल हाजिरी जवाफ प्रतियोगितामा एशिया महादेशबाट प्रथम र विश्वमा तेस्रो भई नेपालको प्रतिष्ठा बढाउने घटराज मेमोरियल स्कुलका विनम पोखरेल र कीर्ति पोखरेललाई नइ देरूनीखपू बाल पुरस्कार समर्पण गर्ने निर्णय गरेको छ ।
त्यसै गरी साहित्यतर्फ आयुष्मा तिवारी, चित्रकलातर्फ सन्ध्या खत्री, सङ्गीततर्फ दृष्टिविहीन प्रोसेस पाण्डे र नृत्यतर्फ लुश्वान मानन्धरलाई ‘नइ देरूनीखपू बाल पुरस्कार समर्पण गरिने भएको छ ।
यी छ वटै पुरस्कारका राशि जनही दस हजार रुपियाँ रहेका छन् ।
यसै गरी गायिका रेवती महर्जन र नृत्यकार सुप्रिया विष्टलाई जनही सात हजार रुपियाँ राशिको ‘नइ देरुनीखपु कोपिला पुरस्कार’ समर्पण गरिने भएको छ ।
साथै चार वर्षीय कृति राईलाई पाँच हजार रूपियाँ राशि र ताम्रपत्रका साथ नइ देरूनीखपू चिचिला पुरस्कार’ समर्पण गरिने भएको छ ।
नइ प्रकाशनका अध्यक्ष श्रीमती इन्दिरा प्रसाईको अध्यक्षतामा बसेको नइ प्रकाशनको बैठकले सो निर्णय गरेको हो ।
शताब्दी पुरुष डा.सत्यमोहन जोशीको १०१ औं शुभजन्मोत्सवका अवसरमा उहाँबाटै आगामी वैशाख ३० गते काठमाडौंमा नइ पुरस्कारहरु समर्पण गरिने नइ प्रकाशनका सदस्यसचिव नरेन्द्रराज प्रसाईले बताउनु भयो ।
