चीनद्वारा एआई चोरी आरोप ‘आधारहीन’ ठहर
पैचिङ । संयुक्त राज्य अमेरिकाले चिनियाँ संस्थाले अमेरिकी कृत्रिम बौद्धिकता (एआई) प्रविधि औद्योगिक स्तरमा चोर्ने प्रयास गरेको आरोप लगाएपछि चीनले त्यसलाई कडा रूपमा अस्वीकार गर्दै ‘आधारहीन’ भनेको छ । बेइजिङले यस्तो आरोपलाई आफ्नो एआई उद्योगको उपलब्धिमाथि लक्षित राजनीतिक आक्षेपका रूपमा व्याख्या गरेको छ ।
ह्वाइट हाउसका विज्ञान तथा प्रविधि प्रमुख माइकल क्रेटसिओसले बिहीबार सामाजिक सञ्जाल प्लेटफर्म एक्समा पोस्ट गर्दै चिनियाँ संस्थाले अमेरिकी एआई प्रविधि ‘औद्योगिक स्तरको ज्ञान सार्ने प्रक्रिया’ मार्फत प्राप्त गर्न खोजिरहेको आरोप लगाउनुभएको थियो । उहाँले अमेरिकी नवप्रवर्तनको रक्षा गर्न आवश्यक कदम चालिने चेतावनी समेत दिनुभएको थियो ।
यसको जवाफमा शुक्रबार बेइजिङमा आयोजित नियमित पत्रकार सम्मेलनमा चिनियाँ विदेश मन्त्रालयका प्रवक्ता गुओ जियाकुनले उक्त आरोपलाई पूर्णरूपमा अस्वीकार गर्नुभयो । उहाँले अमेरिकी दाबीहरू ‘पूर्णतया आधारहीन’ रहेको उल्लेख गर्दै चीनको एआई उद्योगमाथि गरिएको आलोचनालाई निन्दा र बदनाम गर्ने प्रयासका रूपमा वर्णन गर्नुभयो ।
उहाँका अनुसार चीनले यस्तो आरोपको कडा विरोध गर्दछ र अमेरिकालाई तथ्यको सम्मान गर्न, पूर्वाग्रह त्याग्न तथा चीनमाथिको प्राविधिक नियन्त्रण र दबाब नीति रोक्न आग्रह गरेको छ । साथै, दुई देशबीच प्रविधि क्षेत्रमा आदानप्रदान र सहकार्यलाई सहज बनाउन वासिङ्टनले थप सकारात्मक भूमिका खेल्नुपर्ने उहाँको भनाइ थियो ।
यो कूटनीतिक प्रतिक्रिया चीनको एक प्रमुख एआई स्टार्टअप डीपसिकले नयाँ अत्याधुनिक मोडेल सार्वजनिक गरेको केही घण्टापछि आएको हो । उक्त मोडेलले कम लागतमा उच्च क्षमता प्रदर्शन गर्दै विश्व प्रविधि बजारमा पुनः ध्यान तानेको छ र अमेरिकी प्रतिस्पर्धी कम्पनीसँगको दूरी घटाएको दाबी गरिएको छ ।
क्रेटसिओसको पोस्टमा ‘विदेशी संस्था, विशेष गरी चीनमा आधारित निकाय’ ले अमेरिकी एआई प्रविधि हासिल गर्न औद्योगिक स्तरमा ‘ज्ञान सार्ने प्रक्रिया’ अपनाएको आरोप लगाइएको थियो । एआई क्षेत्रमा ‘ज्ञान स्थानान्तरण’ लाई सामान्य विकास अभ्यासका रूपमा लिइन्छ, जसमा ठूला मोडेलको ज्ञान प्रयोग गरी साना र किफायती संस्करण तयार गरिन्छ । रासस/एएफपी
