चीनद्वारा नेटोको प्रतिवाद, आफूलाई ‘चुनौती’ भनेर अतिरञ्जना गरेको आरोप

युरोपेली सङ्घमा रहेको चिनियाँ नियोगले जारी गरेको विज्ञप्तिमा भनिएको छः प्रतिरक्षा र सैन्य आधुनिकीकरणको हाम्रो जोड औचित्यपूर्ण, तर्कसङ्गत, खुला र पारदर्शी छ।

उसले नेटोले चीनको विकासलाई ‘विवेकसङ्गत ढङ्ग’ले हेर्दै ‘चीनका वैध स्वार्थ र अधिकारलाई आफ्ना गठबन्धन राजनीतिक सञ्चालन गर्नका लागि बहानाका रूपमा प्रयोग गर्न, मुडभेड सिर्जना गर्न र भूराजनीतिक प्रतिस्पर्धा गर्न बन्द गर्न’ भनेको छ।

नेटोको वक्तव्य सोमवार ब्रसल्समा भएको उसको एकदिने सम्मेलनको अन्त्यमा आएको थियो। अमेरिकी राष्ट्रपति जो बाइडन पहिलो पटक उक्त सङ्गठनको बैठकमा सहभागी हुनुभएको हो ।
तीस युरोपेली र उत्तर अमेरिकी देशहरूको यस शक्तिशाली राजनीतिक एवं सैन्य गठबन्धनले रुसलाई आफ्नो मुख्य जोखिमका रूपमा हेर्ने गर्छ।

बाइडनले जेनेभामा बुधवार रुसी राष्ट्रपति भ्लादिमिर पुटिनलाई भेट्न लाग्नु भएको छ । बिबिसी