जसपा सरकारमा जाने भएसँगै मन्त्री बन्ने आकांक्षी थपिदै
काठमाडौं, २०७८ जेठ ११ गते मंगलबार । जनता समाजवादी पार्टीका अध्यक्ष महन्थ ठाकुर पक्ष सरकारमा सहभागी हुने कुरा चलिरहँदा अहिले जसपामा मन्त्री बन्नका लागि दौडधूप शुरु भएको छ ।
जसपा महन्थ ठाकुर पक्षमा २० जना पूर्वसांसद छन् भने वर्तमान सरकारमा गैर सांसद पनि मन्त्री बन्न सकिने भएको छ । प्रतिनिधिसभा सदस्य नरहेका नेता पनि मन्त्री बन्न पाउने भएपछि थप दौडधूप शुरु भएको हो ।
तर, प्रधानमन्त्री केपी शर्मा ओलीले ठाकुर पक्षलाई कति वटा मन्त्रालय दिने भन्ने कुरा तय नभइसकेको जसपाको केन्द्रीय सदस्य सन्तोष मेहताले बताउनुभएको छ ।
यता प्रधानमन्त्री ओलीका परराष्ट्र सल्लाहाकार डा.राजन भट्टराइले पनि यस विषय आधिकारी निर्णय नभइसकेको गोरखापत्र अनलाइनलाई जानकारी दिनुभयो ।
केन्द्रीय सदस्य मेहताकाअनुसार अहिले सबैको नाममा दाउ छ । शीर्ष नेता बाहेक अन्य वरिष्ठ नेताहरु पनि मन्त्रीका आकांक्षी देखिएको उहाँले बताउनुभयो ।
शीर्ष नेताहरुमा जसपाका वरिष्ठ नेता राजेन्द्र महतो, शरतसिंह भण्डाारी, अनिलकुमार झा, राजकिशोर यादवको नाम चर्चामा रहेको मेहताले बताउनुभयो ।
‘राजेन्द्र महतो संसदीय दलको नेता हुनुहुन्छ । सरकार, सत्ता र बाँकी विषयका बारे अध्यक्ष ठाकुर र महतो निर्णय लिनुहुन्छ । यस विषयमा उहाँबीच छलफल भइरहेको छ,’ केन्द्रीय सदस्य मेहताले भन्नुभयो । तर, जसपाका अध्यक्ष महन्थ ठाकुर भने आफैँ सरकारमा नजाने हुनुभएको छ ।
‘संसदीय दलको नेता हुनुभएका कारण सरकारको नेतृत्व महतोले गर्नुहुन्छ ,’ उहाँले भन्नुभयो, ‘यी विषयमा निर्णय हुन बाँकी छ ।’ यद्यपी अध्यक्ष ठाकुरको तर्फबाट मन्त्रीको आकांक्षीमा वृषेशचन्द लाल, सर्वेन्द्रनाथ शुक्ला, चन्दा चौधरीलगायतका नेता दौडमा रहेका छन् ।
अध्यक्ष ठाकुरका तर्फबाट मन्त्रीको आकांक्षी हुनुभएका वृषेशचन्द लाललले भन्नुभयो, पार्टीले जे निर्णय गर्छ त्यहि हिसाबले अगाडि बढ्ने बताउनुभयो ।
‘यस विषयमा पार्टी भित्र छलफल भइरहेको छ, उहाँले भन्नुभयो, ‘पार्टीले जे निर्णय गर्छ त्यहि निर्णयलाई आत्मसाथ गरेर अगाडि बढ्छु ।’
यसैगरी जसपाकी नेतृ चन्दा चौधरीले आफू मन्त्रीका लागि आकांक्षी रहेको बताउनुभयो । जसपा सरकारमा सहभागी हुने कुरा चलिरहँदा मन्त्री बन्नका लागि दौडधूप शुरु भएको छ । यसमा तपाईको नाम पनि चर्चामा छ नि ? भन्ने जिज्ञासामा जसपा नेतृ चौधरीले मन्त्रीका लागि आफू आकांक्षी रहेको बताउनुभयो ।
‘नाम चर्चामा छ । तर, पार्टीले यस विषयमा निर्णय लिनुपर्छ,’ उहाँले भन्नुभयो, ‘तर, अहिले कुन मन्त्री लिने भन्ने विषयमा भने निर्णय भइसकेको छ । यो छलफल मै छ ।’
चन्दा चौधरी जसपा अध्यक्ष उपेन्द्र यादवको पक्षबाट महन्थ ठाकुर पक्षमा आएका महिला नेतृ हुन् । गोरखापत्र अनलाईन
