चीनले अनुदानमा दिएको कोरोना विरुद्धको खोप लगाउन थालियो
काठमाडौं, २०७७ चैत २५ गते बुधबार चीन सरकारले अनुदानमा उपलब्ध गराएको कोरोना भाईरस विरुद्धको भेरोसेल खोप पहिलो चरणमा आजदेखि लगाउन सुरु गरिएको छ । काठमाडौं उपत्यकाका विभिन्न १४ वटा स्वास्थ्य संस्थाबाट सो खोप लगाउन सुरु गरिएको हो । नयाँ बानेश्वरस्थित निजामती कर्मचारी अस्पतालमा खोप कार्यक्रमको सुरुवात गर्न नेपालका लागि चिनियाँ राजदूत होउ यान्छी पुग्नुभएको थियो ।
निजामती कर्मचारी अस्पताल, वीर अस्पताल, परोपकार प्रसूति गृह तथा स्त्रीरोग अस्पताल, शुक्रराज ट्रपिकल तथा सरुवा रोग अस्पताल, राष्ट्रिय आयुर्वेद अनुसन्धान तथा तालिम केन्द्र, नेपाल मेडिकल कलेज अत्तरखेल र काठमाडौ मेडिकल कलेज सिनामंगलमामा रहेका केन्द्रबाट खोप लगाउन सुरु गरिएको छ ।
त्यस्तै त्रिवि शिक्षण अस्पताल, शहीद गंगालाल राष्ट्रिय हृदयरोग केन्द्र, वीरेन्द्र अस्पताल छाउनी, नेपाल सशस्त्र प्रहरी अस्पताल, नेपाल प्रहरी अस्पताल, ओम हस्पिटल एण्ड रिसर्च सेन्टर र क्षेत्रपाटी निःशुल्क चिकित्सालयबाट पनि यो खोप लगाउन सुरु भएको छ ।
तोकिएका सबै अस्पतालहरुमा खोप लगाउन मानिसहरु उत्साहीहुँदै विहान ८ वजे नै पुगेका थिए । सिमित मात्रामा खोप आएकोले आफुले लगाउन नपाईने होकि भन्ने चिन्ता अधिकांशमा पाईन्थ्यो । खोप लगाउन आउने अधिकांशले मास्क प्रयोग गरेका भए पनि सामाजिक दूरी भने कतै पनि पालना गरिएको पाईएन । तर मध्यान्ह सम्म पनि मानिसहरु धीरतापूर्वक आफ्नो पालो कुरिरहेका देखिन्थे ।
चिनियाँ अनुदानको खोप चीनमा छात्रवृत्तिमा अध्ययन गर्ने विद्यार्थी, चीनमा अध्ययनमा जाने तयारीमा रहेका व्यक्ति, हिमालय सीमा पार व्यापार गर्ने नेपाली व्यापारी, अत्यावश्यक सेवामा काम गर्ने कर्मचारी, होटल, ट्रेकिङ, विज्ञापन र इन्टरनेट क्षेत्रमा काम गर्ने व्यक्ति, औषधि, फलफूल, तरकारीलगायतका व्यापारी, प्राध्यापकलगायतलाई यो खोप लगाइनेछ ।
