नेपाली कांग्रेसको उपसभापतिमा पूर्णबहादुर खड्का र धनराज गुरुङ निर्वाचित

काठमाण्डौं, २०७८ पुस १ गते बिहीबार । नेपाली काँग्रेसको उपसभापतिमा पूर्णबहादुर खड्का र धनराज गुरुङ निर्वाचित हुनुभएको छ । बुधबार भएको उपसभापति पदको मतगणनामा अन्य प्रतिस्पर्धीलाई पराजित गर्दै खड्का र गुरुङ विजयी हुनुभएको हो ।

निर्वाचन समितिका अनुसार खड्का २ हजार ७६ र गुरुङ १ हजार ८ सय ६९ मत ल्याएर विजयी हुनुभएको हो । उपसभापति पदका उम्मेदवार विजय गच्छदार ९ मतले धनराजसँग पराजित हुनुभएको छ । उहाँले १८ सय ६१ मत प्राप्त गर्नुभएको छ । त्यसैगरी चन्द्र भण्डारीले १५ सय ५१ मत पाउनुभएको छ । उपसभापति पदका उम्मेदवार महेश आचार्य, सुजाता कोइराला र दिव्यश्वरी शाह ठूलो मत अन्तरले पराजित हुनुभएको छ ।