एमाले महाधिवेशनमा सहमतीको प्रयास असफल, ओली र रावलबीच प्रतिस्पर्धा हुने

काठमाडौ, २०७८ मंसिर १३ गते सोमबार । चीतवनको सौराहामा जारी नेकपा (एमाले)को १०औँ महाधिवेशनमा सहमतीको प्रयास असफल भएपछि अन्ततः निर्वाचन हुने भएको छ । अध्यक्ष केपी शर्मा ओलीले सर्वसम्मतबाटै नयाँ पदाधिकारीको टुंगो लगाउन चाहे पनि उपाध्यक्ष भीम रावल र उपमहासचिव घनश्याम भुसाल चुनावमा उत्रनु भएपछि निर्वाचन नै हुने भएको हो।

अध्यक्ष ओलीले आइतबार राति आफ्नो नेतृत्वमा २९ पदाधिकारीको नाम घोषणा गर्नुभएको थियो । तर, यसअघि नै अध्यक्षमा उम्मेदवारी घोषणा गर्नुभएका रावलले र पदाधिकारीमा नसमेटिएका भुसालले उपाध्यक्षमा चुनाव लड्ने बताइरहनुभएको छ ।

एमाले निर्वाचन अयोगले आज बिहानका लागि चुनावको कार्यक्रम तय गरेको छ । आज बिहान ८ बजेदेखि साढे ९ बजेसम्म उम्मेदवारी दर्ताको कार्यक्रम तय गरिएको छ ।

एमाले निर्वाचन आयोगका प्रमुख विजय सुब्बाका अनुसार बिहान साढे १० बजे उम्मेदवारको प्रारम्भिक नामावली प्रकाशन गरिनेछ भने बिहान पौन ११ भित्र उम्मेदवारको विरोधमा उजुरी दिन सकिनेछ । बिहान १०ः५० बजे उजुरीउपर छानबिन र निर्णय हुने कार्यतालिका छ ।

बिहान ११ः५५ देखि १२ बजेसम्म उम्मेदवारलाई उम्मेदवारी फिर्ताको समय निर्धारण गरिएको छ भने १२ः५ बजे उम्मेदवारको अन्तिम नामावली प्रकाशन हुनेछ । आज साँझ ९ बजेदेखि मतदान सुरु हुने कार्यतालिका तय भएको छ । मतदानको समय मंगलबार बिहान ३ बजेसम्म तय भएको छ ।