सबै विदेशी सेना समय सीमाभित्रै फर्किसक्नुपर्छ-तालिबान

काठमाडौं, २०७८ असार २१ गते सोमबार । आगामी सेप्टेम्बर महिनाबाट अफगानिस्तानबाट बाहिरिन उत्तर एटलान्टिक सन्धि संगठन, नेटोले तोकेको समय सीमा पश्चात् त्यहाँ बस्ने कुनै पनि विदेशी सैन्य फौजलाई कब्जा गर्नेहरूका रूपमा लिइने खतरा रहेको तालिबानले बीबीसीलाई बताएको छ।

अफगानी सुरक्षा निकायले एक्लै देशको सुरक्षाको जिम्मा लिने तयारी गर्दै गर्दा काबुलको भविष्यबारे चिन्ता बढिरहेको छ।

तालिबानका प्रवक्ता सुहेल शाहीनले काबुलमा सैन्य कब्जा गर्नु ‘आफूहरूको नीति नरहेको” बताउनु भएको छ।

तर कतारस्थित कार्यालयबाट बीबीसीसँग कुराकानी गर्दै उहाँले काबुलबाट फिर्ता जाने कार्य सम्पन्न भएपछि सैन्य ठेकेदार सहित त्यहाँ कुनै पनि किसिमका विदेशी सेनाको उपस्थिति हुन नहुने बताउनु भयो ।

“दोहा सम्झौताविरुद्ध उनीहरूले सेना कायमै राखे कसरी अघि बढ्ने भन्ने विषयबारे हाम्रो नेतृत्वले निर्णय लिने छ,” शाहीनले बीबीसीसँग भन्नुभयो।

“हामीले प्रतिक्रिया जनाउने छौँ। अन्तिम निर्णय भने हाम्रो नेतृत्वसँगै रहने छ।”

उहाँले कूटनीतिज्ञ, गैर सरकारी संस्था र अन्य विदेशी सर्वसाधारणहरूलाई तालिबानले निशाना नबनाउने बताउँदै उनीहरूलाई दिइँदै आएको सुरक्षाको आवश्यकता नरहेको बताउनु भयो ।

“हामी विदेशी सैन्य फौजको विरुद्धमा छौँ। कूटनीतिज्ञ, गैर सरकारी संस्था, कामदार र दूतावासहरू होइन। त्यो यस्तो कुरा हो जुन हाम्रा मानिसहरूलाई आवश्यक छ,”उहाँले भन्नुभयो।

तालिबानसँग भएको सम्झौता अनुसार अमेरिका र उसका सैन्य गठबन्धनले आफ्ना सबै फौज फिर्ता लैजान सहमत भएका छन्। त्यसका लागि तालिबानले अलकायदा वा अन्य कुनै पनि अतिवादी समूहलाई उनीहरूले नियन्त्रण गर्ने क्षेत्रबाट परिचालित हुन नदिने प्रतिबद्धता जनाएका छन्। बिबिसी