६ सय कैदीको सजाय मिनाहा गर्न गृह मन्त्रालयको प्रस्ताव
काठमाडौं, २०७७ फागुन ३ गते सोमबार
गृह मन्त्रालयले आगामी फागुन ७ गते ‘७१ औं राष्ट्रिय प्रजातन्त्र दिवस’ को अवसर पारेर विभिन्न कारागारमा रहेका करिब ६ सय कैदीको बाँकी सजाय मिनाहा गर्न प्रस्ताव अघि बढाएको छ ।
कारागार व्यवस्थापन विभागका महानिर्देशक द्रोण पोखरेलका अनुसार मुलुकी अपराध संहिता २०७४ बमोजिम अपराधको नकारात्मक सूचीमा नपरेका, ५० प्रतिशत सजाय भुक्तान गरेका, असल चालचलन भएका र जेलर हुँदै प्रमुख जिल्ला अधिकारीबाट सिफारिस भई आएका करिब ४ सय कैदीको बाँकी सजाय मिनाहाको सूची तयार पारिएको छ । यस्तै २०७४ अघिको कानुनअनुसार करिब २ सयको कैद मिनाहाका लागि प्रस्ताव गरिएको छ ।
सरकारले यसअघि गणतन्त्र दिवस (गत जेठ १५) मा २ सय ३३ जना र संविधान दिवस (गत असोज ३) को अवसर पारेर २ सय ८९ जना कैदीको सजाय मिनाहा गरेको थियो ।
विभाग हुँदै गृह मन्त्रालयबाट तयार भएको सजाय मिनाहाको सूची अब बस्ने मन्त्रिपरिषद् बैठकले स्वीकृत गरी राष्ट्रपति कार्यालयमा पठाउने तयारी छ । विभागका अनुसार पुस मसान्तसम्म देशभर मुद्दाको किनारा नलागी पूर्पक्षका क्रममा थुना र अदालतबाट दोषी ठहर भई कैद भुक्तान गरिरहेका कैदीबन्दीको संख्या करिब २५ हजार ५ सय छ । तीमध्ये अदालतबाट दोषी ठहर भई सजाय भुक्तानरत कैदीको संख्या १४ हजार ५ सय ३५ छ, जसमा महिला कैदीको संख्या ८ सय ६७ र बाँकी पुरुष छन् । कान्तिपुर
