अमेरिकामा ‘नो किंग्स’ प्रदर्शन, मध्यावधि निर्वाचनमा मतदान गर्न नागरिकलाई आग्रह

• ट्रम्पको नीतिविरुद्ध अमेरिकाभरि करिब तीन हजार कार्यक्रम ।
• नोभेम्बर ३ को निर्वाचनअघि मतदाता दर्ता र मतदानमा जोड ।
• लोकतन्त्र, जीवनयापनको लागत र मध्यपूर्व युद्ध मुख्य मुद्दा ।

वासिङ्टन । अमेरिकी राष्ट्रपति डोनाल्ड ट्रम्पको नीतिविरुद्ध शनिबार अमेरिकाभरि आयोजित ‘नो किंग्स’ प्रदर्शनमा आयोजकहरूले आगामी मध्यावधि निर्वाचनमा मतदान गर्न नागरिकलाई प्रेरित गरेका छन् । नोभेम्बर ३ मा हुने निर्वाचनअघि मतदाता दर्ता र प्रारम्भिक मतदानबारे सचेतना फैलाइएको हो ।

ट्रम्प पुनः सत्तामा फर्किएपछि चौथोपटक आयोजित यस प्रदर्शनअन्तर्गत अमेरिकाभरि करिब तीन हजार कार्यक्रम भएका थिए । राजधानी वासिङ्टनदेखि न्युयोर्क, लस एन्जलस र साना सहरसम्म प्रदर्शनकारी भेला भएका थिए । जुलुससँगै सवारीसाधनले हर्न बजाउने, सङ्गीत कार्यक्रम गर्ने र छिमेकीबीच भेला आयोजना गर्नेजस्ता गतिविधि पनि भएका थिए ।

वासिङ्टनकी ६६ वर्षीया सेवानिवृत्त शिक्षिका सबिन कार्लसन ‘भोट, शक्ति, जनता’ लेखिएको छाता बोकेर प्रदर्शनमा सहभागी हुनुभएको थियो । उहाँले विरोधमार्फत असन्तुष्टि व्यक्त गर्नु महत्त्वपूर्ण भए पनि मतदान झन् आवश्यक रहेको बताउनुभयो । उहाँले मतदातालाई आफ्नो मतदान केन्द्र पहिचान गर्न र दर्ता विवरण जाँच गर्न आग्रह गर्नुभयो ।

नोभेम्बर ३ को निर्वाचनमा डेमोक्रेटहरूले कङ्ग्रेसको नियन्त्रण लिन खोजिरहेका छन् । जीवनयापनको बढ्दो लागत र मध्यपूर्वको अलोकप्रिय युद्धलाई चुनावी मुद्दा बनाएका उनीहरूले रिपब्लिकन उम्मेदवारसँग कडा प्रतिस्पर्धा गर्नुपर्नेछ ।

लोकतान्त्रिक अधिकारसम्बन्धी संस्था कमन कजकी अल्मा कुभर्थीले मतदानलाई शक्ति प्रयोग गर्ने, सेवा गर्ने र आनन्द लिने माध्यमका रूपमा स्थापित गर्नु प्रदर्शनको उद्देश्य रहेको बताउनुभयो । उहाँका अनुसार व्यापक मतदान सहभागिताले निर्वाचन परिणाममाथि प्रश्न उठाउने प्रयासलाई चुनौती दिन सक्छ ।

राष्ट्रपति ट्रम्पले हुलाकमार्फत हुने मतदानको आलोचना गर्दै आउनुभएको छ । विपक्षीहरूले रिपब्लिकनहरू पराजित भए प्रशासनले निर्वाचन परिणाम कमजोर पार्न सक्ने आशङ्का व्यक्त गरेका छन् । त्यसैले आयोजकहरूले सम्भावित अनियमितताको जोखिम घटाउन समयमै मतदान गर्न प्रोत्साहित गरेका हुन् ।

वासिङ्टनमा प्रदर्शनमा सहभागी एक ५२ वर्षीय पूर्वसैनिकले पछिल्लो १८ महिनामा अमेरिकी राजनीतिमा आएको परिवर्तनप्रति निराशा व्यक्त गर्दै देशलाई पुनः आफ्नो आदर्शअनुरूप बनाउन चाहेको बताउनुभयो । उहाँले नोभेम्बर ३ मा मतदाताले सशक्त प्रतिक्रिया दिने आशा व्यक्त गर्नुभयो ।

अन्य राज्यमा पनि लोकतन्त्र र मतदानको पक्षमा प्रदर्शन भएका थिए । उत्तरी क्यारोलिनाको ग्यास्टोनियामा ‘लोकतन्त्रका लागि हर्न बजाऔँ’ र ‘मतदान गर्ने योजना बनाउनुहोस्’ लेखिएका सङ्केत प्रदर्शन गरिएका थिए । मेन राज्यको पोर्टल्यान्डमा रिपब्लिकन सिनेटर सुसान कोलिन्सलाई लक्षित गर्दै मतको महत्त्व झल्काउने ब्यानर देखाइएका थिए ।

फ्लोरिडाको विल्टन म्यानर्स, जर्जियाको एटलान्टा, मिसौरीको कन्सास सिटी र टेक्सासको ह्युस्टनमा पनि ट्रम्पको नीतिविरुद्ध प्रदर्शन भएका थिए । प्रदर्शनकारीहरूले भ्रष्टाचार, युद्ध अपराधसम्बन्धी विवाद र लोकतन्त्रका विषय उठाएका थिए । क्यालिफोर्नियाका सान डियागो, सान फ्रान्सिस्को र लस एन्जलसलगायत सहरमा समेत प्रदर्शनकारीहरूले ‘नो किंग्स’ भन्ने सन्देशसहित मार्च गरेका थिए । एएफपी