प्रचण्ड-माधवलाई चुनावी मैदानबाट नभाग्न गृहमन्त्री थापाको आग्रह
काठमाडौं, २०७७ पुस २० गते सोमबार
नेपाल कम्युनिष्ट पार्टी (नेकपा)का सचिवालय सदस्य तथा गृहमन्त्री रामबहादुर थापाले पार्टी फुटाउने षडयन्त्रका साथ प्रचण्डले १९ बुँदे आरोप पत्र प्रस्तुत गरेको बताउनु भएको छ ।
अध्यक्ष र प्रधानमन्त्री नपाएर प्रचण्ड-माधवजीले पार्टी छाडेर गएको बताउनुहुँदै गृहमन्त्री थापाले उहाँहरूले पार्टीको भेला नभई गुटको भेला गर्दै हिँडेको बताउनुभयो ।
रेडियो नेपालका अनुसार नेपाल कम्युनिष्ट पार्टी (नेकपा) चितवनले भरतपुरमा आयोजना गरेको बृहत् कार्यकर्ता भेलालाई सम्बोधन गर्दै गृहमन्त्री थापाले प्रधानमन्त्री हुन चुनावमा जान र पार्टी अध्यक्ष हुन महाधिवेशनमा जान चुनौती दिनुभयो । यो संसद्ले प्रधानमन्त्री नबनाउने हुनाले चुनावी मैदानबाट नभाग्न प्रचण्ड-माधवलाई उहाँले आग्रह गर्नुभयो ।
प्रजातान्त्रिक पद्धतिमा कसैको लहड र उत्तेजनाले पार्टी अध्यक्ष र प्रधानमन्त्री हटाउन नसक्ने भन्दै उहाँले महाधिवेशनबाट निर्वाचित अध्यक्ष र जनताबाट विजयी भई संसद्बाट चुनिनु भएका केपी ओलीलाई माधव–प्रचण्डले हटाएको नभै आफै पार्टी छाडेर गएको बताउनुभयो ।
