पूर्व सांसद तथा राजदूत कमान सिंह लामाको कोरोनाका कारण निधन
![](https://voiceofkathmandu.com/wp-content/uploads/2020/12/Kaman-sing-lama.jpg)
काठमाडौं, २०७७ मंसिर २५ गते बिहीबार
नेपाल कम्युनिस्ट पार्टीका केन्द्रीय सदस्य तथा दक्षिण कोरियाका लागि पूर्व राजदूत एवम् पूर्व सांसद कमानसिंह लामाको कोरोना संक्रमणका कारण ६९ वर्षको उमेरमा निधन भएको छ ।
महाराजगञ्जस्थित त्रिवि शिक्षण अस्पतालमा उपचारको क्रममा लामाको गएराति निधन भएको पारीवारीक स्रोतले जनाएको छ । गत मंसिर १० गते कोरोना भाइरस संक्रमण पुष्टि भएपछि लामालाई अस्पताल भर्ना गरिएको थियो ।
काभ्रेपलाञ्चोक जिल्लामा कम्युनिष्ट पार्टीका संस्थापक लामा दुई पटक सांसद समेत हुनु भएको थियो ।
पूर्व राजदुत समेत भएकोले उपचारका लागि कोरीया जान लामाले बिशेष निवेदन दिनु भएको थियो । मृगौलाको क्यान्सरको उपचार गरिएका लामालाई मधुमेह र उच्च रक्तचापको समेत समस्या थियो ।
विक्रम संवत् २००८ साल फागुन ९ गते पिता चन्द्रसिंह र आमा मिश्रीमायाका कोखबाट जन्मिनु भएका लामा विक्रम संवत् २०३३ सालमा निर्मल लामा नेतृत्वको नेकपाबाट कम्युनिस्ट पार्टीको सदस्य बन्नु भएको थियो ।
लामा विक्रम संवत् २०३५ सालमा गठित अखिल नेपाल युवा संघका केन्द्रीय संस्थापक सदस्य हुनुहुन्थ्यो । विक्रम संवत् २०६३ सालमा पुनःस्थापित व्यवस्थापिका-संसद्को सदस्य बन्नु भएका लामाले दक्षिण कोरियाका राजदूत समेत रहेर आफ्नो भूमिका निर्वाह गर्नुभएको थियो ।
लामा सन् २०१२ देखि २०१६ सम्म दक्षिण कोरियाका लागि नेपाली राजदूत हुनुहुन्थ्यो ।
लामाका पत्नी, १ छोरा र ४ छोरी हुनुहुन्छ ।
लामाको निधनमा नेपाल कम्युनिष्ट पार्टी (नेकपा) का अध्यक्षद्वय केपी शर्मा ओली तथा पुष्पकमल दाहाल ‘प्रचण्ड’, मन्त्री प्रदीप ज्ञवाली लगायतले गहिरो दुख व्यक्त गर्नुभएको छ ।