भोजपुर सदरमुकामदेखि टक्सार विमानस्थल पुग्ने सडकखण्डको कालोपत्रे सम्पन्न
काठमाडौं, २०७७ कात्तिक १८ गते मंगलबार
वर्षातका कारण लामो समय रोकिएको भोजपुर सदरमुकामदेखि टक्सार विमानस्थलसम्मको सडकखण्डको कालोपत्रे काम सम्पन्न भएको छ । ५ किलोमिटर दुरीको उक्त सडकखण्डको कालोपत्रे कामले गती पाएपछि तोकिएको समयअघि नै काम सम्पन्न भएको हो ।
प्रदेश सरकारको महत्वपूर्ण योजना भएकाले कालोपत्रेको गुणस्तरमा ध्यान दिइएको पूर्वाधार विकास कार्यालय भोजपुरले जनाएको छ । प्रदेश १ सरकारको १६ करोड ९२ लाख लगानीमा बनेको उक्त कालोपत्रेको मोटाई ४ सेन्टिमिटर छ ।
जिल्लामै पहिलो आसफल्ट प्रविधीबाट गरिएको कालोपत्रे गुणस्तरीय भएको दाबी ईन्जिनियर अमृत कुमार दाहालको दाबी छ । ‘यो जिल्लाका लागि उच्च गुणस्तरको नयाँ प्रविधिको कालोपत्रे हो, प्रदेश सरकारको महत्वपूर्ण योजना भएकाले कालोपत्रे कामलाई गुणस्तरीय बनाउन हामी लागी पर्यौँ’ उहाँले भन्नु भयो ।
विभिन्न समयमा कालोपत्रे कामको अनुगमन पनि गरिएको थियो । मापदण्ड अनुसारकै गुणस्तरीयता पाईएको प्रमुख जिल्ला अधिकारी बसन्तराज पुरीले बताउनु भयो ।
मौसममा सुधार आएकाले पनि निर्माण कार्य तोकिएको समय अगावै सम्पन्न भएको ठेकेदार कम्पनी रायमाझी जगदम्बा मार्सेली निर्माण सेवाले जनाएको छ । अन्नपूर्ण पोष्ट दैनिक अनलाईनबाट
