लिदी पहिरोमा २९ शव फेला पर्यो
सिन्धुपाल्चोक, २०७७ भदौं ४ गते बिहीबार
जुगल गाउँपालिका-२ लिदी पहिरोमा बेपत्तामध्ये हालसम्म २९ जनाको शव फेला परेको छ । उक्त पहिरोमा परेर ३९ जना बेपत्ता भएका थिए । जिल्ला प्रहरी कार्यालयका डिएसपी माधवप्रसाद काफ्लेले आज थप चार शव भेटिएको जानकारी दिनुभयो । लिदीमा भीषण वर्षा भइरहेकाले बेपत्ताहरूको खोजीकार्यमा समस्या भइरहेको उहाँले बताउनुभयो ।
एक पुरुष, एक बालक र दुई महिलाको शव फेला परेको छ । गोरखापत्र अनलाईनका अनुसार आज ४४ वर्षीय हिरा दोङ, पाँच वर्षीय सानुकान्छा दोङ, ४२ वर्षीया जिबिरानी दोङ र १८ वर्षीया ललिता दोङको शव फेला परेको सूचना अधिकारी समेत रहेका काफ्लेले जानकारी दिनुभएको छ । हालसम्म १६ पुरुष र १३ महिलाको शव भेटिएको छ । तीमध्ये १४ बालबालिका रहेका छन् । स्काभेटर ल्याउन नसकिएपछि सेना, सशस्त्र, प्रहरी र स्थानीयले कोदालो पिकलगायत घरेलु सामानद्वारा बेपत्ताको खोजी गरिरहेको काफ्लेले बताउनुभयो ।
