पोखरा विमान दुर्घटनाः शव काठमाण्डौं पठाइँदै
पोखरास्थित सेती नदी खोंचमा आइतबार यती एयरलाइन्सको विमान दुर्घटना हुँदा ज्यान गुमाएकाहरुको पहिचान हुन नसकेपछि शव पोष्टम्याटमका लागि काठमाडौं लैजाने तयारी गरिँदै । तस्बिर : धनबहादुर गुरुङ, रासस
काठमाण्डौं, २०७९ माघ ३ गते मंगलबार । आइतबार पोखरामा यती एयरलायन्सको जहाज दुर्घटनामा परी मृत्यु भएका केही व्यक्तिको शव आज काठमाण्डौं पठाउने तयारी गरिएको छ ।
शवको पहिचान गरी पोखरा र आसपासका व्यक्तिको शव यही नै आफन्तलाई बुझाउनका लागि सोमबारदेखि नै शव परीक्षण गर्न थालिएको छ । चिन्न नसकिने अवस्थाका, काठमाण्डौं सहित आसपासका , विदेशी नागरिक एवं चालक दलका सदस्यको शव आज पठाउने तयारी गरिएको कास्कीका प्रमुख जिल्ला अधिकारी टेकबहादुर केसीले जानकारी दिनुभयो ।
“हालसम्म पहिचान भएका २०-२२ जनाको शव यही नै आफन्तलाई बुझाउने गरी परीक्षण भइरहेको छ”, उहाँले भन्नुभयो, “अन्य शव लैजानका लागि हेलिकोप्टर सोमबार नै पोखरा आइसकेको छ ।” शव पहिचान गर्ने काम पनि भइरहेको र मौसम पनि चिसो रहेका कारण आजै बिहान १०-११ बजेतिर काठमाण्डौं पठाइने प्रजिअ केसीले जानकारी दिनुभयो । रासस
