भक्तपुर १ मा नेमकिपाका प्रेम सुवाल भारी मतले विजयी
भादगाउँ, २०७९ मंसिर ८ गते बिहीबार । भक्तपुर क्षेत्र नं १ नेपाल मजदूर किसान पार्टीका सचिव प्रेम सुवाल भारी मतले विजयी हुनुभएको छ ।
भर्खरै सम्पन्न मतगणनामा सुवाल ४२ हजार ७ सय ५९ मतका साथ विजयी हुनुभएको हो । उहाँका प्रतिस्पर्धी नेकपा (एमाले)का नवराज गेलालले ११ हजार ९ सय ५८ मत प्राप्त गर्नुभयो । सुवालले गेलाललाई ३० हजार ८ सय १ मतान्तरलेपछि पार्नुभएको हो ।
त्यसैगरी राप्रपाका भरतबहादुर खड्काले ९ हजार ३ सय ३ र सत्ता गठबन्धनका तर्फका साझा उम्मेदवारका रुपमा नेकपा (माओवादी केन्द्र)का सुनिल गोठेले ५ हजार २ सय ८३ मत प्राप्त गरेको मुख्य निर्वाचन अधिकृत गोपालप्रसाद बाँस्तोलाले बताउनुभयो ।
भक्तपुर १ मा २०७४ सालको निर्वाचनमा नेमकिपाका सुवाल ३३ हजार ७६ मतका साथ विजयी हुनुभएको थियो । उहाँका प्रमुख प्रतिद्वन्द्वी नेपाली कांग्रेसका बाबुराजा जोशीले १७ हजार ८ सय १८ र माओवादी केन्द्रका मिलन सुवालले १५ हजार ३ सय ७४ मत प्राप्त गर्नुभएको थियो ।
जिल्ला निर्वाचन कार्यालयका अनुसार भक्तपुर क्षेत्र नं १ मा कूल एक लाख एक हजार दुई सय ६१ मतदाता रहेका छन् । त्यसमध्ये ४९ हजार आठ सय ३९ पुरुष र ५१ हजार चार सय २२ महिला छन । रासस
