लेस्टर सिटीको फराकिलो जित

काठमाण्डौं, २०७९ असोज १८ गते मंगलबार । इंग्लिस प्रिमियर लिग फुटबलमा लेस्टर सिटीले फराकिलो जित निकालेको छ ।

गएराति भएको खेलमा लेस्टरले नटिङ्घम फरेस्टलाई ४-० गोलले हराएको हो । लेस्टरका जेम्स म्याडिसनले दुई गोल गर्नुभयो । उहाँले खेलको २५ औँ र ३५ औँ मिनेटमा गोल गर्नुभएको हो । त्यस्तै खेलको २७ औँ मिनेटमा हार्वे बार्नस र ७३ औँ मिनेटमा प्याट्सन डाकाले गोल गर्नुभयो ।

जितसँगै लेस्टर सिटीले ८ खेलमा ४ अंक जोडेको छ । लेस्टर अंक तालिकामा पुछारबाट दोस्रो स्थानमा छ । समान खेलमा ४ अंक नै रहेको नटिङ्घम फरेस्ट पुछारमा छ । यो सिजनमा नटिङ्घम फरेस्ट २३ वर्षपछि लिगमा फर्किएको हो । यो टिम सन् १९९९ मा रेलिगेसनमा परेको थियो ।