न्यूयोर्कको म्यानह्याटनमा नेपाल डे परेड २०२२ सम्पन्न(फोटो फिचर सहित)

कृष्ण आचार्य, न्यूयोर्क, २०७९ जेठ १२ गते बिहीबार ।  संसारकै राजधानीको रुपमा परिचित एवम् पर्यटनको केन्द्र अमेरिकाको न्यूयोर्क सहरमा नेपाल र नेपालीको पहिचान झल्काउने नेपाल डे परेड २०२२ सम्पन्न भएको छ । यो परेड न्युयोर्कको लागि पाँचौं संस्करण हो ।

परेड एनआरएनए एनसिसी न्युयोर्क च्याप्टरको मुल आयोजनामा नेपाललाई विश्व सामु चिनाउने उद्देश्यका साथ यही मे २२, २०२२ मा न्युयोर्क सहरको म्यानह्याटनमा गरिएको हो ।

कार्यक्रममा प्रमुख अतिथि- संयुक्त राष्ट्र संघका लागी नेपालका स्थायी प्रतिनिधि तथा राजदूत अमृत बहादुर राई तथा कन्भेनर-विकाश रुवाली  बिशेष अतिथि-डेप्यूटी कमिस्नर अफ मेयर अफिस फर इण्टरनेशनल अफेअर्स दिलिप चौहान साथै महावाणिज्यदूत बिष्णु गौतम, वाणिज्यदूत गणेशप्रसाद अधिकारी, एनआरएनए एनसिसी अमेरिकाका अध्यक्ष बुद्दिसागर सुबेदी, एनआरएनए अमेरिका पूर्व अध्यक्ष खगेन्द्र जीसी, नेपाल डे परेड पूर्व अध्यक्ष निमा शेर्पा लगायत न्यूयोर्क सिटीका प्रतिनिधि समेतको उपस्थिती थियो । कार्यक्रमको सभापतित्व एनआरएनए एनसिसी अमेरिका,न्यूयोर्क च्याप्टरका अध्यक्ष तथा नेपाल डे परेडका अध्यक्ष आंग छिरिङ्ग शेर्पाले गर्नुभएको थियो ।

प्रवासी नेपालीहरुको उल्लेख्य उपस्थितिमाझ नेपाली मौलिकता झल्किने झाँकीहरु सहितको प्रदर्शनीमा सहभागी विभिन्न संघ संस्थाका प्रतिनिधि, पत्रकार तथा वुद्धिजीवी, अतिथि सबैको सहभागिताले कार्यक्रम सफल पारेको थियो।