राजधानी दैनिकका अध्यक्ष महेन्द्र शेरचनको कोरोना संक्रमणबाट निधन

काठमाण्डौं, २०७८ भदौं ३ गते बिहीबार । राजधानी दैनिकको प्रकाशक संस्था राजधानी न्युज पब्लिकेशनका अध्यक्ष महेन्द्र शेरचनको कोरोना संक्रमणका कारण निधन भएको छ। नेपाल एपिएफ अस्पतालमा बुधबार बेलुका शेरचनको निधन भएको हो। उहाँ ६७ वर्षको हुनुहुन्थ्यो ।

राजधानी न्युज पब्लिकेशनका संस्थापक अध्यक्ष शेरचन नेपाली मिडिया सञ्चालकको छाता संगठन मिडिया सोसाइटीका पूर्व अध्यक्ष समेत हुनुहुन्थ्यो । अहिले मिडिया सञ्चालककै संस्था मिडिया अलाइन्सको उपाध्यक्ष हुनुहुन्थ्यो। संविधानसभाका पूर्व सदस्य समेत रहनु भएका उहाँ वैदेशिक रोजगार व्यवसायी संघका पनि संस्थापक अध्यक्ष समेत हुनुहुन्छ ।

शेरचनका श्रीमती, तीन छोरा र एक छोरी रहनु भएको छ । उहाँको आज (बिहीबार) बिहान ११ बजे पशुपति आर्यघाट स्थित विद्युतीय शवदाह गृहमा अन्तिम संस्कार गरिने भएको छ।