मेलम्ची खानेपानी आयोजनाका आठजना कामदार सम्पर्क विहीन
काठमाडौं, २०७८ असार २ गते बुधबार । वर्षाका कारण आएको बाढीले गर्दा मेलम्ची खानेपानी आयोजनामा कार्यरत आठ जना सम्पर्कविहीन भएका छन् । तीन चिनियाँ, तीन भारतीय र दुई जना नेपालीसहित आठ जना कामदार बेपत्ता भएको मेलम्ची खानेपानी विकास समितिले जनाएको छ ।
नेपाल प्रहरी, सशस्त्र प्रहरी, स्थानीयवासीकाे सहयोगमा उनीहरूको खोजी भइरहेको छ ।
निर्माणस्थलमा रहेका ७६ जनालाई हेलिकप्टरमार्फत उद्धार गरी काठमाडौं र धुलिखेल ल्याइएको आयोजनाले जनाएको छ । उद्धार भएका सबैको अवस्था अहिले सामान्य छ ।
आयोजनाको मुख्य सुरुङ, पानी प्रशोधन केन्द्र र मुख्य बाँधमा क्षति नपुगेको विवरण प्राप्त भएको आयोजनाले जनाएको छ । आयोजनाको क्याम्पहरू, उपकरणहरू, निर्माण सामग्री, पहुँच सडक र पुल बाढीले बगाएको छ ।
मङ्गलवार साँझ झन्डै सात बजे आयोजना क्षेत्रमा बाढी पसेको थियो । अम्बाथानमा रहेकाे ‘हेडवर्क्स’ भन्दा माथि परिरहेको अविरल वर्षाका कारण बाढी आएको थियो । उज्यालो अनलाईन
