प्रधानमन्त्री ओली अहिले गृह जिल्ला झापा जाँदै

काठमाडौं, २०७७ फागुन १६ गते आईतबार

प्रधानमन्त्री केपी शर्मा ओली औद्योगिक क्षेत्र शिलान्यासलगायतका विभिन्न कार्यक्रममा सहभागी हुन आज गृह जिल्ला झापा जाँदै हुँनुहुँन्छ । दमकस्थित सप्तरङ्गी एफ एमका अनुसार विहान ११:३० वजेदेखि प्रधानमन्त्रीको औपचारिक कार्यक्रम सुरु हुने बताईएको छ । झापाको दमक नगरपालिका, कमल गाउँपालिका र गौरादह नगरपालिकामा फैलिने औद्योगिक क्षेत्रलाई ‘चीन-नेपाल मैत्री औद्योगिक पार्क’ नाम दिइएको छ । ६४ अर्ब रुपैयाँ लगानी रहने ‘चीन-नेपाल मैत्री औद्योगिक पार्क’ पीपीपी मोडलमा निर्माण गर्ने सम्झौता भइसकेको छ ।

सरकारले एक सातामा पाँच वटा औद्योगिक क्षेत्र शिलान्यास कार्यक्रम निर्धारण गरेको थियो । सो कार्यक्रमअनुसार फागुन १० गते कञ्चनपुरको दैजीछेला औद्योगिक क्षेत्र, फागुन ११ गते बाँकेको नौबस्ता औद्योगिक क्षेत्र, फागुन १३ गते रुपन्देहीको मोतीपुर औद्योगिक क्षेत्र र १४ गते मकवानपुरको मोतीपुर औद्योगिक क्षेत्र शिलान्यास भइसकेका छन् । हाल नेपालमा ११ वटा औद्योगिक क्षेत्र सन्चालित छन् । उहाँ आजै काठमाडौं फर्कने बताईएको छ ।