Wed. Apr 9th, 2025 10:27:28

खानेपानीको पाइप फुट्दा बबरमहल क्षेत्र जलमग्न

खानेपानीको पाइप जलमग्न जिल्ला अदालत परिसर काठमाण्डू, ३० माघ : मेलम्ची खानेपानीको पाइप फुटेर आज जलमग्न भएको काठमाण्डूको बबरमहलस्थित जिल्ला अदालत दोस्रो भवन परिसर । तस्बिरः रत्न श्रेष्ठ/रासस

काठमाण्डू, २०८१ माघ ३० गते बुधबार । खानेपानीको थोक प्राणालीको पाइप फुट्दा काठमाण्डूको बबरमहल क्षेत्र जलमग्न भएको छ । आज दिउँसो विद्युत् प्राधिकरणले विद्युत्का तारहरू अण्डरग्राउण्ड गर्नका लागि ‘होेरिजोन्टल ड्रिलिङ’ गर्ने क्रममा बबरमहलस्थित खानेपानीको थोक वितरण प्रणालीको पाइप फुटेपछि सो क्षेत्र जलमग्न भएको हो ।

काठमाण्डू उपत्यका खानेपानी आयोजना कार्यान्वयन निर्देशनालय (पिआइडी) का प्रमुख टीकाबहादुर चौधरीले विद्युत्का तारहरू अण्डरग्राउण्ड गर्नका लागि ‘होेरिजोन्टल ड्रिलिङ’ गर्ने क्रममा खानेपानीको थोक वितरण प्रणालीको पाइप फुटेको राससलाई जानकारी दिनुभयो । उहाँले भन्नुभयो, “पाइप फुटेपछि पानी वितरण गर्ने भल्ब बन्द गरी पाइप सफा गर्नेकाम (वास आउट) भइरहेको छ । हालसम्म पानी बग्न भने रोकिएको छैन ।”

पाइप फुटेर पानी पसेपछि बबरमहलस्थित विशेष अदालतसहित वरपरका सरकारी भवन जलमग्न बनेका थिए भने केही सवारीसाधन डुबानमा समेत परेका थिए ।

Facebook Comments