भारतले लद्दाखमा गोर्खा सैनिकलाई पठाएको भन्दै ग्रेटर नेपालको आपत्ति

काठमाडौं, २०७७ भदौं २१ गते आईतबार

भारतले गोर्खाली सेनालाई नेपालको घनिष्ठ मित्र चीनविरुद्ध प्रयोग गर्न लद्दाखमा तैनाथ गराएको भन्दै ग्रेटर नेपाल राष्ट्रवादी मोर्चाले आपत्ति जनाएको छ ।

भारतले चिनियाँ सैनिकविरुद्ध विकास बटालियन, ३/९ जिआर र ४/१ जिआरका गरी झण्डै चार हजार गोर्खाली सैनिक परिचालन गरेर नेपाल-चीनबीचको सम्बन्धलाई धाँजा पार्ने काम गर्न खोजेको ग्रेटर नेपाल राष्ट्रवादीको ठहर छ ।

सन् १९४७ नोवेम्वर ९ को गोर्खा भर्तीसम्बन्धी त्रिदेशीय सम्झौता रद्द गरी त्यहाँ कार्यरत नेपाली युवकहरूलाई नेपाल फर्कन आदेश जारी गर्न सरकारलाई अनुरोध गरेको व्यहोरा मोर्चाका तर्फबाट अध्यक्ष फणिन्द्र नेपालद्वारा आइतबार जारी विज्ञप्तिमा उल्लेख छ ।

‘नेपाल र नेपालीको निकटतम् मित्र चीनकाविरुद्ध इन्डियाका पक्षबाट नेपालीले नै लडिदिनुपर्ने यो विडम्बनापूर्ण युद्धले नेपाललाई जबरजस्ती चीनको शत्रु बनाउने परिस्थितिमा पु¥याउने’ मोर्चाको विज्ञाप्तिमा भनिएको छ ।

‘तसर्थ परिस्थिति भड्किनुभन्दा पहिल्यै नेपालले प्रभावकारी सावधानी अपनाउनुपर्छ र त्यो भनेको गोर्खाभर्ती सम्झौता रद्द गर्नु नै हो भन्ने ग्रेटर नेपाल राष्ट्रवादी मोर्चाको दृढ मान्यता रहेको छ,’ विज्ञप्तिमा उल्लेख छ । गोर्खा सैनिकलाई चीन विरुद्ध प्रयोग गर्नु मित्रघात हुने नेपालको धारणा छ ।

ग्रेटर नेपाल स्थापनाकालदेखि नै राष्ट्रियताको पक्षमा आवाज उठाउँदै आइरहेको संगठन हो ।