नेपाली कांग्रेसको केन्द्रीय कोषाध्यक्षमा व्यवसायी उमेश श्रेष्ठ मनोनित

काठमाण्डू, २०८१ मंसिर ९ गते आईतबार ।  नेपाली कांग्रेसको केन्द्रीय कोषाध्यक्षमा व्यवसायी उमेश श्रेष्ठ मनोनयन हुनुभएको छ ।

कांग्रेस सभापति एवं पूर्वप्रधानमन्त्री शेरबहादुर देउवाले पार्टीको विधान, २०१७ (संशोधन सहित) को धारा २१ को उपधारा (४) बमोजिम केन्द्रीय कार्यसमितिका निर्वाचित सदस्य श्रेष्ठलाई पार्टीको केन्द्रीय कार्यसमितिको कोषाध्यक्ष पदमा मनोनयन गर्नुभएको पार्टी केन्द्रीय कार्यालयका मुख्यसचिव कृष्णप्रसाद पौडेलले जानकारी दिनुभयो ।

व्यवसायीका रुपमा श्रेष्ठले शिक्षा, पर्यटन, ऊर्जा र बैंकिङ क्षेत्रमा लगानी गर्नुभएको छ । २०७९ को निर्वाचनमा श्रेष्ठ चितवन क्षेत्र नम्बर २ बाट चुनावमा उठ्नुभएको थियो । तर, रास्वपाका सभापति रवि लामिछानेसँग उहाँ पराजित हुनुभएको थियो । यसअघि उहाँ राज्यमन्त्री बन्नुभएको थियो ।