बीआरआई रिणको जालो भन्ने प्रचारवाजी गलत भएको विज्ञहरुको भनाइ

रमेश हतुवाली/काठमाण्डू, २०८१ साउन ३ गते बिहीबार । चिनियाँ विकास परियोजना बीआरआई नेपाल जस्ता मुलुकहरुका लागि रिणको जालो वा रिणको पासो भनि गरिएको प्रचारवाजी गलत भएको विज्ञहरुले बताएका छन् ।

नेत्र विक्रम चन्द विप्लव नेतृत्वको नेपाल कम्युनिष्ट पार्टीको अन्तर्राष्ट्रिय विभागले आज काठमाण्डूस्थित नेपाल प्रज्ञा प्रतिष्ठानमा आयोजना गरेको “बीआरआई वास्तविकता र भ्रम” विषयक अन्तरक्रियामा सहभागी कुटनीतिज्ञ तथा राजनीतिज्ञहरुले चिनियाँ विकास परियोजना बीआरआई नेपाल जस्ता मुलुकहरुका लागि रिणको जालो वा रिणको पासो भन्ने प्रचारवाजी गलत भएको बताएका हुन् । उनीहरुले नेपालजस्ता विकासोन्मुख मुलुकहरुका लागि बीआरआई परियोजना मुलुकको स्वाधिनता, स्वतन्त्रता र आर्थिक विकासका लागि महत्वपूर्ण रहेको टिप्पणी गरेका छन् ।

बीआरआई रिणको जालो भन्ने प्रचारवाजी गलत भएको विज्ञहरुको भनाइ, मुलुकको स्वाधिनता र विकासका लागि बीआरआई आवश्यक रहेको राजनीतिज्ञहरुको टिप्पणी ।।

नेपाल खुला विश्व विद्यालयका डीन प्राध्यापक डाक्टर खगेन्द्र प्रसाईले बीआरआईसँगको नेपालको सम्लग्नताले नेपालको भारत लगायतका देशहरुसँगको परनिर्भरता हट्ने र दक्षिण तथा शहरी क्षेत्रमुखी विकासलाई पहाडीक्षेत्रतिर विस्तार गर्न सहयोग पुग्ने बताउनु भयो । डा. प्रसाईले अफ्रिकाको विकासमा बीआरआईले कायापलट गरेको अमेरिकी विज्ञहरुको भनाईले पनि नेपाल जस्ता मुलुकहरुको विकास र प्रभाव विस्तारका लागि बीआरआई महत्वपूर्ण हुने धारणा व्यक्त गर्नुभयो ।

नेपाल कम्युनिष्ट पार्टी माओवादी केन्द्रका महासचिव तथा पूर्वमन्त्री देव प्रसाद गुरुङले नेपालजस्तो विकासोन्मुख मुलुकका लागि बीआरआई परियोजना मुलुकको स्वाधिनता, स्वतन्त्रता र आर्थिक विकासका लागि महत्वपूर्ण रहेको बताउनु भयो । बीआरआईसँगको सम्झौताका कुनै पनि बुदा नेपालको हित विपरीत नभएको भन्दै नेता गुरुङले बीआरआई परियोजना नेपालमा भित्रियाउँदा नेपाल रिणको जालोमा फस्छ भन्ने प्रचार गलत भएको जानकारी पनि दिनुभयो ।

वरिष्ठ लेखक तथा कुटनीतिज्ञ हिरण्यलाल श्रेष्ठले बीआरआईसँगको नेपालको सहकार्यले नेपालमाथि भारतले फेरी पनि नाकाबन्दी लगाउन सक्ने अवस्थाको अन्त्य भएको बताउनुहुँदै विश्व रंगमञ्चमा नेपालको प्रभाव बीआरआईकै कारण बढिरहेको धारणा व्यक्त गर्नुभयो ।

चीनका लागि पूर्व नेपाली राजदूत लीलामणी पौड्यालले विकासोन्मुख देशहरुले प्राप्त गर्ने अनुदान घटिरहेको जानकारी दिनुुहुँदै नेपाल जस्ता देशहरुले विकास निर्माणका लागि लिएको रिणको अवस्थाबारे स्पष्ट छलफल गर्नुपर्ने र बिआरआई बाट प्राप्त सहयोगले देशलाई रिणको पासोमा पार्छ भन्ने प्रचारवाजी गलत भएको बताउनु भयो ।

नेपाल कम्युनिष्ट पार्टीका महासचिव नेत्र विक्रम चन्द विप्लवले बीआरआईसँगको नेपालको अपेक्षा कनेक्टीभिटि भएको बताउनुहुँदै नेपालले बीआरआई परियोजनामार्फत प्रशस्त फाईदा लिन सक्ने धारणा व्यक्त गर्नुभयो । महासचिव विप्लवले चीन सरकारले साझा भविष्यका लागि विश्वव्यापी सहकार्यको उद्देश्यसहित अघि सारेको बेल्ट एन्ड रोड इनिसियटिभ (बीआरआइ) नयाँ सभ्यताको लडाइ भएको पनि बताउनु भएको छ ।

नेत्र विक्रम चन्द विप्लव, महासचिव, नेपाल कम्युनिष्ट पार्टी, फोटो: रमेश हतुवाली

कार्यक्रमका बक्ताहरुले बीआरआई परियोजनाका बारेमा गरिँदै आएका गलत प्रचारवाजीका पछाडी नलागी चीनको विकास निर्माणका उपलब्धिबाट फाईदा लिन सक्नु पर्ने बताउनुभयो ।