कार्ल मार्क्सको पोस्टमार्टम
महान दार्शनिक कार्ल मार्क्स
काठमाडौं, २०७७ बैशाक २६ गते शुक्रबार
-फणीन्द्र नेपाल
काठमाडौंको सिंहदरबारमा कार्ल मार्क्सको दिनदहाडै हत्या गरिएको छ
हत्यापछि उनीहरू कालो सिसा भएको गाडीमा चढेर अज्ञात ठाउँतिर भागेका छन्
हत्याराहरूले नकाब लगाएका हुँदा परिचय खुल्न नसके पनि
घटनास्थलमा एउटा हँसिया र एउटा हथौड़ासँगै ह्विस्कीको बोतल, टेलिफोनको एक मिटर तार, अमेरिकी पेस्तोलको गोलीको खोका र एउटा भाला फेला परेको छ
अँ, एउटा धारिलो छुरा पनि ।।
पोस्टमार्टमको रिपोर्टअनुसार
टेलिफोनको तारले मार्क्सको घाँटी कसेर हँसियाले रेटिएको छ
र फलामको हथौड़ाले हानेर उनको टाउको फुटाइएको छ
उनको छातीमा गोली लागेका प्वालहरू छन् र पिठ्युँमा भाला रोपिएको छ
अनि ह्विस्कीको बोतल फुटाएर पेटमा घोपिएको छ
मरेपछि पनि आफूतिर हेरिरह्यो भनेर दुइटै आँखामा छुरा धसिएको छ
लासको छेवैमा हँसियाहथौडा अङ्कित झन्डा मार्क्सको रगतमा लतपतिएको छ ।।
कसले गर्यो होला कार्ल मार्क्सको हत्या ?
प्रहरीको अनुसन्धान जत्था कुनै सूत्रको खोजीमा छ
पत्रकार सम्मेलनमा प्रहरी प्रवक्ताले भने
कार्ल मार्क्सको हत्या उनकै चेलाहरूले गरेका रहेछन्
पहिलो हत्यारा, जसले भ्रष्टाचारका प्रत्येक आरोपीलाई ढाल बनेर बचाएको छ
दोस्रो हत्यारा, जसले एउटा निजी दूरसञ्चार कम्पनीको अधिकांश सेयर आफ्नो नाममा पारेको छ
तेस्रो हत्यारा, देशका अधिकांश सुपर मार्केटहरूमा जसको बहुसंख्यक सेयर छ
चौथो हत्यारा, बिचौलिया पनि हो, जसले मेलम्चीलाई पर धकेल्दै पानीको व्यापारमा एकाधिकार कायम गरेको छ
पाँचौँ हत्यारा, जसले सडकको अलकत्रा खाएको छ र यससँगै ऊ भूमाफिया पनि हो
छैटौँ हत्यारा, जसका धेरै वैदेशिक रोजगार कम्पनी र मेडिकल कलेजहरू छन्
सातौँ हत्यारा, जसको मुट्ठीमा सेयर मार्केट, हुन्डी, म्याच फिक्सिङ र क्यासिनोहरू छन् ।
यिनीहरू यो देशलाई पर्दापछाडिबाट चलाउँछन्
माफ गर्नुहोला पत्रकार महोदय, यिनीहरू कति शक्तिशाली छन् भने
प्रहरी प्रतिष्ठान उनीहरूलाई तपाईंहरूसमक्ष सार्वजनिक गर्न असमर्थ छ ।
काठमाडौंको सिंहदरबारमा कार्ल मार्क्सको दिनदहाडै हत्या गरिएको छ ।।।
– फणीन्द्र नेपाल ग्रेटर नेपालका अविराम अभियन्ता हुनुहुन्छ ।
