प्रधानमन्त्री प्रचण्डलाई चीनको हाङ चौ विमानस्थलमा भव्य स्वागत, राष्ट्रपति चिनफिङसँग आजै भेटवार्ता हुने

काठमाण्डू, २०८० असोज ६ गते शनिबार ।  प्रधानमन्त्री पुष्पकमल दाहाल ‘प्रचण्ड’ न्यूयोर्कबाट आज चीन पुग्नु भएको छ। अमेरिकाको भ्रमण सकेर हङकङ हुँदै प्रधानमन्त्री प्रचण्ड आजै बिहान चीनको हाङ चौ आइपुग्नु भएको हो ।

हाङ चौ विमानस्थल अवतरण गर्नुभएका प्रधानमन्त्री प्रचण्डलाई चीन सरकारका खेलकुद मन्त्री तथा चिनियाँ ओलम्पिक कमिटीका अध्यक्ष काओ चितानले भव्य स्वागत गर्नुभयो । आजै चीनका राष्ट्रपति सी चिनफिङले प्रधानमन्त्री प्रचण्डसँग दिवा भोजसहित भेटघाट गर्ने कार्यक्रम रहेको छ । संयुक्त राष्ट्रसंघको महासभालाई सम्बोधन गरी प्रधानमन्त्री प्रचण्ड शुक्रबार न्यूयोर्कबाट चीन जानुभएको हो । हाङ चौमा हुने एसियाली खेलकुदको उद्घाटन समारोहमा सरिक हुनुअघि प्रधानमन्त्री प्रचण्डले राष्ट्रपति चिनफिङसँग भेटवार्ता गर्नुहुने बताइएको छ ।

भोलि आइतबार चीनको राजधानी पैचिङ जानुहुने प्रधानमन्त्री प्रचण्डले आगामी सोमबार चिनियाँ प्रधानमन्त्री लि छ्याङ्सँग भेटवार्ता गर्ने कार्यक्रम छ । भ्रमणका क्रममा प्रधानमन्त्री प्रचण्डले छोङछिङ महानगरपालिकामा रहेको छोङछिङ एकेडमी अफ एग्रीकल्चरल साइन्सको अवलोकन पनि गर्नुहुनेछ ।

पैचिङबाट छन्तु हुदै प्रधानमन्त्री प्रचण्ड आगामी शनिबार स्वदेश फर्कने कार्यतालिका रहेको छ ।