मेची-काली उल्टो पदयात्रामा ‘रुपना थारू’
-यज्ञराज आङ्गदेम्बे, दमक, २०७९ माघ २३ गते सोमबार । मेचीदेखि महाकालीसम्मको उल्टो यात्रामा निस्कनुभएका बाँके, कोहलपुर नगरपालिका-७ का ४८ वर्षीय उल्टो पैदलयात्री रुपना थारू आज दिउँसो दमक आइपुग्नुभएको छ ।
श्रीमती सम्झनाको सहयोगबाट थारूले गत माघ २१ गते पूर्वी नाका कांकडभिट्टाबाट महाकालीसम्मको एक हजारभन्दा बढी किलोमिटर उल्टो पदयात्रामा निस्किनुभएको हो । दुई दिनमा उहाँले करिब ५२ किलोमिटर यात्रा पूरा गर्नुभएको छ ।
सामान्य खेतीपाती गरी आउनुभएका थारू दम्पती दैनिक २०/२५ किलोमिटर पैदल हिँड्ने अटोठका साथ यात्रामा निस्किनुभएको हो । दमकमा भेटिनुभएका पदयात्री थारूले विश्वशान्तिको कामना गर्दै आफूले दुई महिनाभित्रमा महाकाली पुगेर पदयात्रा समापन गर्ने लक्ष्य लिएको बताउनुहुन्छ । पूर्वपश्चिम राजमार्गमा उल्टो हिँडेर आफ्नो लक्ष्य पूरा गर्ने आत्मविश्वासमा हुनुहुन्छ रुपना । उहाँ भन्नुहुन्छ, “उल्टो हिँडेर लक्ष्यमा पुग्न आफैँमा कठिन हो, तर पनि दुखी भने बिल्कुल छैन ।”
पदयात्रा सुरक्षित बनाउन आफैँ होसियारी अपनाउनुहुन्छ उहाँ । दिनभरि हिँडे पनि साँझ पर्नासाथ बाँस बस्ने बन्दोबस्ती गर्नुहुन्छ थारू दम्पती । साँझ परेपछि राजमार्गमा सहजै हिँड्न सकिँदैन श्रीमान्लाई बाटो देखाउँदै सुल्टो हिँडेर सहयोग गरिआउनुभएकी छ । उहाँको यात्रालाई सहजीकरण गरिआएको श्रीमती सम्झनाको भनाइ छ ।
पदयात्री थारूका अनुसार पदयात्रा हिँड्दा धेरै कठिनाइ हुन्छ । बाटोमा जङ्गलसमेत भएका हुँदा त्यस्ता ठाउँमा सुरक्षाको बन्दोबस्ती भए सहज हुने उहाँ बताउनुहुन्छ । नगरपालिकाले दिएको सिफारिस कागजपत्र देखाउँदै उहाँले दुई दिनमा राजमार्ग आसपासका ट्र«ाफिक प्रहरीले भने सहयोग पु-याएको अनुभव सुनाउनुहुन्छ । यसरी नै सहयोग पाए पक्कै पनि मेरो यात्रा सहज हुने उहाँको आत्मविश्वास छ ।
यात्राका क्रममा बाटो आसपासका प्रहरी कार्यालयले खानेबस्ने बन्दोबस्ती गरिआएको बताउँदै पदयात्री रुपना भन्नुहुन्छ, “बाटोमा हिँड्दै गरेको बेला स्थानीयबाट समेत उत्तिकै सहयोग, सद्भाव पाएको छु, यस्तै सहयोग पाए आभारी हुने थिए ।”
पदयात्रा हरेक मानिसको आ-आफ्नो रहर भए पनि यस कार्य भने फरक भएको उहाँको बुझाइ छ । मेरो उद्देश्य सारा पृथ्वीजगत्को कल्याणको छ, मनभरि यही कामना लिएर यात्रारत भएको उहाँले सुनाउनुभयो । यात्रा काठमाडौँ पुग्ने र त्यसपछि महाकाली फर्किने तय गरेको समेत उहाँ बताउनुहुन्छ । उल्टो हिँडेर पशुपतिनाथ मन्दिरको पहिलोपटक दर्शन गर्ने इच्छा भएको भन्नुहुँदै उहाँले त्यसलगत्तै महाकालीसम्मको आफ्नो गन्तव्यमा लाग्ने योजना बताउनुभयो ।
आफूले यात्राका क्रममा देखेकाभोगेका र विश्वशान्तिका सद्कर्मका बारेमा सामान्य भलाकुसारीसँगै अनुभव आदानप्रदान गरिआउनुभएको छ । यो यात्राले मेरो जीवनलाई सतकर्ममा हिँड्न प्रेरणा दिने ठान्नुहुन्छ । उहाँ भन्नुहुन्छ, “पूर्वमेचीदेखि पश्चिममा महाकालीसम्म फैलिएको मेरो देशलाई विश्वभर चिनाउन उल्टो पदयात्राले विश्वभर चिनाउने आशा लिएको छु ।” रासस
