मन्त्री गोकुल बास्कोटाले कमिसनको कुरा गरेको अडियो सार्वजनिक
काठमाडौं, २०७६ फागुण ८ गते बिहीबार
प्रधानमन्त्री केपी शर्मा ओली पत्रकारले भाषा बिगारेको आरोप बारम्बार लगाउने गर्नुहुन्छ । र, प्रधानमन्त्री आफूले भ्रष्टाचार नगर्ने र अरुलाई पनि गर्न नदिने पनि बारम्बार बताउँनु हुन्छ ।
तर, बालकोटस्थित प्रधानमन्त्रीकै निजी निवासमा बस्दै आउनु भएका सूचना प्रविधि तथा सञ्चार मन्त्री गोकुल बास्कोटाले मन्त्रालयका कर्मचारीलाई स्त्रीजन्य अश्लील शब्दले गाली गर्दै दलालसँग कमिसनको कुरा गरेको अडियो सार्वजनिक भएको छ ।
‘यस्तो कुरामा यी मु‘ कर्मचारीसँग लग्यो भने यिनीहरुले हेप्छन्‘’ अडियो सम्वादमा सेक्युरिटी प्रेसबारे मन्त्री बास्कोटाले कर्मचारीलाई संकेत गर्दै एजेन्टसँग भन्नु भएको छ, ‘यो मु‘।ले बनाएको त ३५ अर्बको छ नि, यो ३५ अर्ब नै नभएपछि, २७ अर्बको निस्केपछि २८ अर्ब बनाउनोस् ।’
अडियो सम्वादमा मन्त्री बास्कोटासँग कुरा गर्ने व्यक्ति स्वीस कम्पनीको एजेन्ट हो भन्ने कुराकानीबाट बुझ्न सकिन्छ । अडियोको सुरुमै एजेन्टले मन्त्री बास्कोटालाई भनेका छन्,‘ यो १२ गते १२ बजेपछि स्वीस एम्बेसी आउँछ।। समय मिलाउनुहोला ।’
अनलाइनखबरलाई प्राप्त २ मिनेट ३० सेकेन्डको अडियोमा सेक्युरिटी प्रेसका एजेन्ट र मन्त्री बास्कोटावीच ७४–७५ करोड कमिसन लेनदेनबारे कुरा भएको छ । मन्त्री बास्कोटाले कर्मचारीहरुलाई नभन्नु भन्दै कमिसन लेनदेनमा सहमति जनाएको अडियो सम्वादमा सुन्न सकिन्छ ।
सूत्रहरुका अनुसार मन्त्री बास्कोटासँग कमिसनबारे सम्वाद गर्ने व्यक्ति स्वीस कम्पनीका एजेन्ट विजय मिश्र हुन् ।
मन्त्रीसँग एमओयु गर्ने र कमिसन लेनदेन गर्ने कुराकानी भइसकेपछि मन्त्री पछि हटेपछि स्वीस एजेन्टले अडियो ‘लिक’ गरेको देखिन्छ ।
अडियोमा के छ त ?
मन्त्री बास्कोटाले स्वीस कम्पनी केबीए नोटासिसका नेपाल प्रतिनिधि (एजेन्ट) सँग कमिसनबारे छलफल गरेको अडियो सार्वजनिक भएको हो । सञ्चारमन्त्री बास्कोटाले स्वीस कम्पनीको स्थानीय एजेन्ट विजयप्रकाश मिश्र शर्मासँग कुन ट्रयाकबाट जाँदा कमिसन बढी पाइन्छ भन्नेबारे सल्लाह गरेको अडियोमा सुनिन्छ ।
अडियोमा स्वीस एम्बेसी आउने भन्दै एजन्टले मन्त्रीसँग समय मिलाउन भनेका छन् । मन्त्री बास्कोटाले ‘नर्मलमा ५० आउँछ ?’ भनेर सोधेका छन् ।
समान्य तवरबाट काम गर्दा थोरै कमिसन आउने भएकाले मिश्रले ‘आउट अफ ट्रयाक’बाट जान मन्त्रीलाई सुझाएका छन् ।
यो प्रक्रियाबाट कुल ७० देखि ७४ करोड कमिसन आउने र त्यसको ७० प्रतिशत मन्त्रीलाई मिल्ने मिश्रले मन्त्रीलाई बुझाएका छन् । ५४-५५ करोड मन्त्रीको हात पर्ने मिश्रले बताएका छन् ।
मन्त्रीले अडियोमा एजेन्ट (मिश्र)लाई कति प्रतिशत आउँछ त भनर समेत सोधेको पनि सुनिन्छ । मिश्रले ३० प्रतिशत आफूलाई आउने र त्यो एकदम पारदर्शी हुने बताएका छन् । मिश्रले १५-१६ करोड आफूलाई आउने बताएका छन् ।
मन्त्री बास्कोटाले अडियोमा २५ देखि २७ अर्बको परियोजना बनाउन लागेको बताएको सुनिन्छ । एजेन्ट मिश्रले पनि परियोजना जतिको बन्छ त्यसकै आधारमा प्रतिशत निर्धारण हुने बताएका छन् ।
मिश्रसँग मन्त्री बास्कोटाले कर्मचारीसँग कसले कुरा गर्ने भनेर प्रश्न सोध्नु भएको छ । उहाले कर्मचारीसँग आफूले कुरा गर्दा हेप्ने भएकाले एजेन्टलाई नै त्यसमा लाग्न भन्नु भएको छ । एजेन्टले मन्त्रीको प्रस्तावमा सहमति जनाएका छन् ।
मिश्रले कुनै कर्मचारीतर्फ संकेत गर्दै ‘उसले बनाएर राखिसकेको छ’ भन्दा मन्त्री बास्कोटाले यता २७ अर्बको निस्कियो भने उता २८ अर्बको बनाउन मिश्रलाई भन्नु भएको छ ।
मिश्रलाई गत महिना संसदको सार्वजनिक लेखा समितिले बोलाएर विज्ञका रुपमा सुरक्षण मुद्रण योजनाबारे जानकारी लिएको थियो ।
उनले मिश्रले यो परियोजनामा ५०-६० मिलियन युरो (साढे ६र७ अर्ब रुपैयाँ) तलमाथि गर्न खोजिएको दाबी गरेका थिए ।
प्रतिस्पर्धाका आधारमा सेक्युरेटी प्रिन्टिङ स्थापना नगर्दा राज्यले ६ देखि साढे ९ अर्ब क्षति बेहोर्ने उनको दाबी थियो ।
विज्ञ मिश्रका अनुसार स्वीट्जरल्यान्डको केबीए नोटासिस कम्पनीले २०० मिलियन युरोमा नै नोटसहित सबैखालको सुरक्षण मुद्रण स्थापना गर्ने प्रस्ताव लगानी बोर्डमा पुगेको पनि थियो ।
तर, त्यसलाई प्रक्रियामा सहभागी नै गराइएन । अहिले गर्न लागिएको सम्झौताअनुसार नोट छाप्ने प्रेस थप्दासम्म ३ सय मिलयन युरो खर्चिनुपर्ने हिसाब–किताब उनले सुनाएका थिए । साढे ७ देखि १० अर्ब झ्वाम पार्ने नियत सरकारको देखिएको उनले दाबी गर्दै आएका छन् ।
मन्त्रीको बोलीमा छाडापन, आर्थिक अनुशासनमा गम्भीर प्रश्न
कमिसनका विषयमा सार्वजनिक भएको अडियोबारे बुझ्न हामीले मन्त्री बास्कोटालाई सम्पर्क गर्न खोज्यौं, तर उहाको मोबाइल स्वीच्ड अफ थियो ।
केही दिनअघि अनलाइनखबरकर्मीसँग भएको भेटमा मन्त्री बास्कोटा कतिपय दलालहरुले आफूसँग आर्थिक लेनदेनका विषयमा कुराकानी गर्ने र मोबाइलमा रेकर्ड गर्ने प्रयास गरेको बताएका थिए । त्यसो गर्न खोज्नेलाई आफूले ‘मलाई कति दिन्छौ’ भन्दै प्रश्न सोध्ने गरेको सुनाउनु भएको थियो ।
यसअघि मन्त्री बास्कोटाले आफूलाई दुईवटा कुरामा कसैले फसाउन नसक्ने हाँक दिने गर्नु भएको थियो,-एउटा मीटू र अर्को घुस ।
तर, विहीबार सार्वजनिक भएको अडियो र त्यसमा प्रयुक्त भाषाले मन्त्री बास्कोटामाथि गम्भीर प्रश्न उठाइदिएको छ । अनलाईन खवरबाट
