विमान दुर्घटनामा बुढेसकालको सहारा खोसिएपछि…
रुपन्देही, २०७९ माघ २ गते सोमबार । बुढेसकालको एकमात्र सहारा पोखरा विमान दुर्घटनामा गुमाउनुपरेपछि तिलोत्तमा-४ डिङ्गरनगरका पदमबहादुर बुचामगर र सूर्यकुमारी बुचा सम्हालिन सक्नुभएको छैन ।
पोखरास्थित ब्रिटिस वेलफेयर अस्पतालमा कार्यरत छोरा ३६ वर्षीय डा गणेश थापाको आइतबार विमान दुर्घटनामा निधन भएपछि डिङ्गरनगरस्थित बुचा दम्पतीको घर र सिङ्गो तिलोत्तमा शोकमा छ । आफ्नी श्रीमती र छोरीलाई भेटेर हिजो त्रिभुवन अन्तर्राष्ट्रिय विमानस्थलबाट यति एयरलाइन्सको जहाजबाट उडेका डा थापा पोखरा विमानस्थलमा ओर्लन नपाउँदै दुर्घटनामा परे ।
चिकित्सकसमेत रहेकी श्रीमती रोनी महर्जन र दुई वर्षीय छोरीलाई काठमाण्डौंमा भटेर फर्किएका थापाको यो नै परिवारसँगको अन्तिम भेट भयो । बिदाको समयमा श्रीमती र छोरीलाई भेटेर आइतबार पोखरा फर्किँदै गरेको अवस्थामा थापा दुर्घटनामा पर्नुभएको थियो । विमान दुर्घटनामा छोरा परेको खबर सुन्नासाथ पदमबहादुर र सूर्यकुमारीका आँसु रोकिएको छैन ।
बुचा दम्पतीका दुई सन्तानमध्ये डा. थापा कान्छो सन्तान हुन् । थापाकी दिदी काठमाण्डौंमै हुनुहुन्छ । तिलोत्तमा-४ का वडाध्यक्ष हरिबहादुर क्षेत्रीका अनुसार सोही वडाकै सिद्धार्थ बोर्डिङ स्कुलबाट एसएलसीसम्म अध्ययन गरेका थापाले बुटवलस्थित ग्लोरियस कलेजबाट प्लस टुसम्मको अध्ययन गर्नुभएको थियो ।
प्लस टु अध्ययनपछि चीनको जिनिङ मेडिकल युनिभर्सिटीबाट एमबिबिएस र अस्ट्रेलियाबाट एमपीएच अध्ययन पूरा गर्नुभएको थियो । केही वर्ष मनमोहन कार्डियोथोरासिक भास्कुलर तथा ट्रान्सप्लान्ट सेन्टर र वीरेन्द्र सैनिक अस्पतालमा काम गरेपछि उहाँ पछिल्लो केही वर्षयता ब्रिटिस वेलफेयर अस्पतालमा कार्यरत हुनुहुन्थ्यो ।
बुबा पदमबहादुर र आमा सूर्यकुमारीले छोरालाई डाक्टर बनाउने सपना पूरा भएको खुसी धेरै वर्ष टिक्न पाएन । छोरालाई डाक्टर बनाउन सानो खर्चले नपुग्ने भएपछि थापाका बुबा पदम वैदेशिक रोजगारीका लागि जर्मनीसमेत जानुभएको थियो । छोरा चिकित्सक बनेपछि भने उहाँ वैदेशिक रोजगारीबाट फर्किएर घरमै बस्दै आउनुभएको थियो । छोराको कमाइ खाएर आराम गर्ने समयमा बुचा दम्पतीको परिवारमा बज्रपात परेको छ । एकमात्र छोरा गुमाउनुपर्दाको खबर आमा सूर्यकुमारीले अझै पत्याउन सक्नुभएको छैन ।
डा. थापाकी धर्मपत्नी र दुई वर्षीया छोरी काठमाण्डौंमै रहेकाले बुबा पदम र आमा सूर्यकुमारी आफन्तीसँग काठमाण्डौं पुग्नुभएको छ । विमान दुर्घटनामा निधन भएकाहरूको शव आज काठमाण्डौं ल्याइने भएकाले उहाँहरू काठमाण्डौं जानुभएको वडाध्यक्ष क्षेत्रीले बताउनुभयो । उहाँका अनुसार डा थापाको शव अन्तिम संस्कारका लागि तिलोत्तमा ल्याउने तयारी छ ।
माघ १ गते आइतबार बिहान काठमाण्डौंबाट पोखराका लागि उडेको यती एयरलाइन्सको कल साइन ‘नाइन एन-एनएसी’ ६९१ उडानको एटीआर ७२ विमान अवतरण हुनुअघि पोखराको सेती खोँचमा दुर्घटनाग्रस्त भएको थियो । विमानमा चालक दलका चार सदस्य र ६८ यात्रु गरी ७२ जना सवार थिए ।
