पेट्रोल र डिजल प्रतिलिटर तीन रुपैयाँ सस्तो
काठमाण्डौं, २०७९ पुस १ गते शुक्रबार । नेपाल आयल निगमले पेट्रोलियम पदार्थको मूल्य सामान्य अङ्कले घटाएको छ । शुक्रबार मध्यरातदेखि लागू हुने गरी निगमले पेट्रोल र डिजलमा साविकको खुद्रा बिक्री मूल्यमा प्रति लिटर रु. ३ ले घटाएको छ ।
यसअघि पेट्रोल प्रतिलिटर रु. १ सय ८१ रहँदै आएकामा अब भने प्रतिलिटर रु. १ सय ७८ मा बिक्री हुनेछ । डिजल प्रतिलिटर रु. १ सय ७८ मा बिक्री भइरहेकामा अब भने रु. १ सय ७५ मा बिक्री हुनेछ । मट्टीतेल प्रतिलिटर रु. १ सय ७८ मा बिक्री हुँदै आएकामा अब भने रु. १ सय ७५ मा बिक्री वितरण हुने निगमले जनाएको छ । खाना पकाउने एलपी ग्यास र हवाई इन्धनको मूल्य भने हाललाई यथावत नै राखिएको छ ।
निगमले सरकार र इण्डियन आयल कर्पोरेशनलाई नियमित भुक्तानीसहित रु. १९ अर्ब तिर्न बाँकी रहेको जनाएको छ । बाँकी बक्यौता तथा सरकारले उपलब्ध गराएको ऋणको व्यवस्थापन गर्न निगमलाई अझै चुनौतीपूर्ण रहेको जनाइएको छ ।
