मुस्ताङमा कांग्रेसका योगेश गौचन थकाली विजयी
मुस्ताङ, २०७९ मंसिर ५ गते सोमबार । मुस्ताङबाट प्रतिनिधिसभा सदस्यमा नेपाली कांग्रेसका योगेश गौचन थकाली निर्वाचित हुनुभएको छ ।
निवर्तमान सांसद नेकपा (एमाले)का केन्द्रीय सदस्य प्रेमप्रसाद तुलाचनलाई ९ सय १४ मतान्तरले पछि पार्दै २९ वर्षीय गौचन प्रतिनिधिसभा सदस्यमा निर्वाचित हुनुभएको हो ।
राससका अनुसार मुख्य निर्वाचन अधिकृत ईश्वर पराजुलीले गौचनले ३ हजार ९ सय ९२ र एमालेका तुलाचनले ३ हजार ७८ मत प्राप्त गरेका जानकारी दिनुभयो । राष्ट्रिय स्वतन्त्र पार्टीका सुदेश गुरुङले ८७ र राष्ट्रिय प्रजातन्त्र पार्टी (राप्रपा) का प्रवीणकुमार शेरचनले १३ मत प्राप्त गर्नुभएको छ ।
आइतबार भएको चुनावमा मुस्ताङमा १० हजार ९ सय ५७ मतदातामध्ये ७ हजार २ सय ३० अर्थात् ६५ दशमलव ९८ प्रतिशत मत खसेको थियो । योगेश सम्भवतः कान्छो प्रतिनिधिसभा सदस्य बन्नुहुनेछ । गौचन मुस्ताङको थासाङ गाउँपालिका-३ लेते कालोपानीका बासिन्दा हुनुहुन्छ ।
