माओवादी अध्यक्ष दाहाल र सिपिसी विदेश विभाग प्रमुख लिउबीच भेटवार्ता   

काठमाण्डौं, २०७९ असार २७ गते सोमबार । चारदिने नेपाल भ्रमणमा रहनुभएको चिनियाँ कम्युनिष्ट पार्टी (सिपिसी)का विदेश विभाग प्रमुख लिउ च्यानछाओले नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ सँग शिष्टाचार भेटवार्ता गर्नुभएको छ । आज अपराह्न अध्यक्ष दाहाल निवास खुमलटारमा भएको सो भेटमा दुई देशका सरकार तथा पार्टी बीचका सम्बन्धका बारेमा कुराकानी भएको भेटमा सहभागी माओवादीका नेता नारायणकाजी श्रेष्ठले जानकारी दिनुभयो ।

“सौहार्द्रपूर्ण वातावरणमा वार्ता सम्पन्न भयो । वार्तामा अध्यक्ष दाहालले चिनियाँ कम्युनिष्ट पार्टीको नेतालाई पार्टीका तर्फबाट स्वागत गर्नुभयो । चीन र नेपालका बीचमा राज्य-राज्य, जनता–जनता र पार्टीहरूका बीचमा पनि राम्रो सम्बन्ध भएकामा आभार व्यक्त गर्नुभयो”, अध्यक्ष दाहालको भनाइ उद्धृत गर्दै उहाँले भन्नुभयो ।

भेटमा अध्यक्ष दाहालले आगामी दिनमा दुई देशका सहकार्यका क्षेत्रमा अझ राम्रो सम्बन्ध हुने भन्ने विश्वास व्यक्त गर्नुभएको थियो । माओवादीका तर्फबाट नेपालका सबै पार्टी र जनता एक चीन नीतिप्रति प्रतिबद्ध रहेको र चीनलाई असल छिमेकीका रुपमा स्वीकार गर्ने कुरामा एकै ठाउँमा रहेको विचार व्यक्त गर्नुभएको नेता श्रेष्ठले जानकारी दिनुभयो ।

अध्यक्ष दाहालले नेपालको विकासको प्रक्रियामा चीनले अहिलेसम्म गरेको सहयोगप्रति धन्यवाद व्यक्त गर्दै चीनले सहयोग गर्नुपर्ने विषयमा ठोस रुपमा चिनियाँ कम्युनिष्ट पार्टी र चीन सरकारको ध्यानाकर्षण गराउनुभएको थियो । “विशेषतः चीनमा चिकित्सा विषय अध्ययनरत नेपाली विद्यार्थीले भोग्नु परेका समस्या समाधान गर्ने, दुई देशबीचको व्यापार घाटा न्यूनीकरण गर्न चीनको सहयोगको अपेक्षा र अरनिको राजमार्गको स्तरोन्नति तथा केरुङ–रसुवागढी नाकामार्फत हुने द्विपक्षीय व्यापारमा सहयोग गर्न आग्रह गर्नुभयो”, भेटमा सहभागी नेता श्रेष्ठले भन्नुभयो ।

“नेपाल चीनलाई असल मित्रका रुपमा स्वीकार गर्दै स्वतन्त्र परराष्ट्र नीतिमार्फत राम्रो सम्बन्ध विकास गर्न चाहन्छ । नेपालको भूमि प्रयोग गरेर चीन विरोधी कुनै पनि गतिविधि गर्न नदिनेमा सिङ्गो नेपाल राज्य, नेपाल सरकार र माओवादी पार्टी प्रतिबद्ध छ”, अध्यक्ष दाहालको भनाइ उद्धृत गर्दै नेता श्रेष्ठले भन्नुभयो ।

चिनियाँ कम्युनिष्ट पार्टीका अन्तर्राष्ट्रिय विभागका नेता लिउले माओवादी केन्द्र, नेपालका सबै राजनीतिक पार्टी, नेपाल सरकार एक चीन नीतिप्रति प्रतिबद्ध रहेको र नेपालको भूमिमा चीन विरोधी गतिविधि हुन नदिने प्रतिबद्धतामा एकै ठाउँमा रहेकामा खुसी व्यक्त गर्दै सबैप्रति आभार व्यक्त गर्नुभएको थियो ।

नेपालको विकासको प्रक्रियामा आगामी दिनमा सँधै चीनले सहयोग गर्ने प्रतिबद्धता व्यक्त गर्नुभएको थियो । बेल्ट एन्ड रोड इनिसियटिभ (बिआरआई) सम्झौताका सन्दर्भमा नेपालले ठोस योजना छनोट गरेको अवस्थामा त्यसलाई अगाडि बढाउन सकिने बताउनुभएको नेता श्रेष्ठले जानकारी दिनुभयो । नेपाल र नेपालका कुनै पनि पार्टीको आन्तरिक मामिलामा हस्तक्षेप नगर्ने चीन र चिनियाँ कम्युनिष्ट पार्टीको नीति रहेको उहाँले जानकारी गराउनुभएको थियो । रासस