सल्यानमा भएको बस दुर्घटनामा १२ जनाको मृत्यु

काठमाण्डौं, २०७८ कात्तिक २१ गते आईतबार । सल्यानमा आज भएको बस दुर्घटनामा परी १२ जनाको मृत्यु भएको छ ।सल्यानबाट दाङको तुलसीपुरतर्फ जाँदै गरेको रा १ ख २५५२ नम्बरको बस कपुरकोट गाउँपालिका-५ खारखोलामा दुर्घटना हुँदा मृत्यु हुनेमा १० जना पुरुष र २ जना महिला रहेका छन् ।

जिल्ला प्रहरी प्रमुख डीएसपी गोविन्द थापाका अनुसार दुर्घटनास्थलमा ६ जनाको  र उपचार गर्न लैजाने क्रममा बाटोमा ६  जनाको गरी १२ जनाको मृत्यु भएको जिल्ला प्रहरी कार्यालय सल्यानका डिएसपी गोविन्द थापाले जानकारी दिनुभयो ।

दुर्घटनामा कम्तीमा १८ जना घाइते भएका प्रहरीले बताएको छ । घाइतेमध्ये गम्भीर अवस्थाका ७ जनालाई उपचारका लागि नेपालगञ्ज पठाइएको र अरु घाइतेको श्रीनगर र खलंगाका विभिन्न अस्पतालमा उपचार भइरहेको प्रहरीले जनाएको छ । बस सडकबाट २ सय मिटर तल खोलामा बसेको र स्थानीय बासिन्दा र प्रहरीले उद्दार गरिरहेको छ ।