नेपाल एयरलाइन्सका जहाजलाई अक्सिजन सिलिण्डर ल्याउने चटारो

काठमाडौं, २०७८ जेठ ३ गते सोमबार । नेपाल एयरलाइन्सका जहाजलाई विभिन्न मुलुकबाट धमाधम अक्सिजन सिलिण्डर नेपाल ल्याउने चटारो परेको छ । कोरोना भाइरसका संक्रमितहरुमा अक्सिजन अभावले मुलुकका विभिन्न अस्पतालमा बिरामीको उपचारमा कठिनाइ भइरहेका बेला नेपाल एयरलायन्सका विमानहरुलाई अक्सिजन ल्याउन चटारो परेको हो ।

 निगमको वाइड बडी ए ३३० जहाजले चीन र ओमानबाट अक्सिजन सिलिण्डरलगायत अत्यावश्यक स्वास्थ्य सामग्री ल्याएको छ । निगमको जहाजले पैचिंगबाट आइतबार र सोमबार ९७५ थान अक्सिजन सिलिण्डर काठमाडौं ल्याएको छ । निगमका महाप्रवन्धक डिमप्रकाश पौडेलका अनुसार दुई दिनमा क्रमशः ४०० र ५७५ अक्सिजन सिलिण्डर र १५७ अक्सिजन कन्सर्नट्रेटर ल्याइएको छ । चीनबाट थप दुई उडानमार्फत अक्सिजन सिलिण्डर ल्याउने तथा अन्य स्वास्थ्य सामग्री पनि ल्याउने योजना रहेको छ ।

निगमले यसअघि वैशाख २८ गते चीनबाटै ४०० थान अक्सिजन सिलिण्डर, १० थान भेण्टिलेटरसहितका स्वास्थ्य सामग्री काठमाडौँ ल्याएको थियो । यीसबै सामग्री चीन सरकारले अनुदान स्वरुप नेपाललाई दिएको हो ।

चीन सरकारको दुई हजार अक्सिजन सिलिण्डर अतिरिक्त चीनस्थित नेपाली एनआरएन आइसिसिले सहयोगमा १०० थान, चीनमा रहेका एक नेपाली तथा अन्य चिनियाँ नागरिकको सहयोगमा ७६ थान, होङसी ग्रुपले २७ थान र करुणा फाउण्डेशनको सहयोगमा ११० थान गरी कुल अतिरिक्त ३१३ वटा अक्सिजन सिलिण्डर नेपाल ल्याउने निगमले जनाएको छ ।

गत शनिबार पनि निगमले गैर आवासीय नेपाली सङघको सहयोग र नेपाली दूतावास ओमनको सहकार्यमा ओमनबाट सहयोग स्वरुप प्राप्त भएको ५६० थान अक्सिजन सिलिण्डर काठमाडौं ल्याएको थियो ।  गोरखापत्र अनलाईन