समृद्धि प्राप्तिको राष्ट्रिय अभियान सफल पार्न सरकार लागिपरेको छ : प्रधानमन्त्री

काठमाडौं, २०७८ बैशाक ६ गते सोमबार । प्रधानमन्त्री केपी शर्मा ओलीले समृद्धि प्राप्तिको राष्ट्रिय अभियान सफल पार्न सरकार हर क्षेत्रबाट लागि परेको बताउनुभएको छ । देशको पुराना विद्यालयहरू मध्ये पर्ने ललितपुरको पाटन माध्यमिक विद्यालयको नवनिर्मित भवनको आज (सोमबार) उद्घाटन गर्नुहुँदै प्रधानमन्त्री ओलीले ९७ वर्षअघि अर्थात् देशमा प्रवेशिका परीक्षा बोर्ड बन्नुभन्दा अघि स्थापित विद्यालयले नयाँ भवन पाउँदा गुणस्तरीय शिक्षा दिन सकिने अर्को एक अवसर प्राप्त भएको समेत बताउनुभयो ।

विद्यालयको स्थापना १९८१ मा तत्कालीन प्रधानमन्त्री चन्द्र शमशेरले गर्नुभएको थियो । पाटन मावि देशमा धेरै पुस्ता, प्रणाली र शासनबीच पुलको काम गर्ने पनि प्रधानमन्त्री ओलीले बताउनुभयो  । विद्यालय स्थापना तत्कालीन श्री ३ चन्द्र शमशेरमा रहेको धेरै खालका काम गर्ने प्रवृत्तिको परिणाम समेत भएको धारणा पनि उहाँको थियो ।