भारतमा माओवादी हमला: २२ जना सुरक्षाकर्मीको मृत्यु

काठमाडौं, २०७७ चैत २२ गते आईतबार भारतको छत्तीसगढ राज्यमा माओवादीहरूले प्रहरीको कमाण्डो युनिटलाई धरापमा पारेर गोली चलाउँदा कम्तीमा २२ जना प्रहरीको ज्यान गएको अधिकारीहरूले पुष्टि गरेका छन्। बिजापुर जिल्लाको जङ्गली इलाकामा शनिवार उक्त घटना भएको बताइएको छ। छत्तीसगढका एक वरिष्ठ सुरक्षा अधिकारी अशोक जुनेजाले उक्त हमलापश्चात् एकजना जवान अझै हराइरहेको बताउनु भएको छ ।

पछिल्ला वर्षहरूको एक सबभन्दा घातक हमलामा परेपछि केही सुरक्षाकर्मीसँगको सम्पर्क टुटेको थियो। लगत्तै परिचालित खोज टोलीले उनीहरूको शव फेला पारेको थियो। प्रधानमन्त्री नरेन्द्र मोदीले उक्त घटनापछि ट्वीट गर्दै मृतकका परिवारहरूप्रति समवेदना व्यक्त गर्नुभएको छ । “छत्तीसगढमा माओवादीसँग लड्दा लड्दै शहिद भएकाहरूको परिवारप्रति मेरो समवेदना छ। वीर शहिदहरूको बलिदान कहिले पनि बिर्सिने छैन। घाइतेहरूको शीघ्र स्वास्थ्य लाभको कामना गर्छु,”उहाँले लेख्नु भएको छ।  बीबीसी हिन्दी सेवामा प्रकाशित समाचार अनुसार हमलाको खबर पाएपछि हाल आसाममा रहनु भएका गृहमन्त्री अमित शाह आइतवार साँझ दिल्ली फर्कँदै हुनुहुन्छ ।