नवरात्रको नवौँ दिनः शक्तिपीठमा भक्तजनको घुइँचो
काठमाण्डू महानगरपालिका–३० स्थित मैतीदेवी मन्दिरमा पूजा आराधना गर्न आएका भक्तजन । यस वर्ष नवरात्रमा महाष्टमी तिथि दुई दिन परेकाले आज सोमबार पनि महाष्टमी पर्व मनाइँदै छ। नेपाल पञ्चाङ्ग निर्णायक विकास समितिले हिजोकै जस्तै महाष्टमीका धार्मिक विधि दोहोर्याउन सुझाव दिएको छ। तस्बिरः लोकेश धामी/रासस
काठमाण्डू । नवरात्रको नवौँ दिन आज काठमाण्डू उपत्यकालगायत देशका विभिन्न भागमा अवस्थित शक्तिपीठ एवं देवी मन्दिरमा भक्तजनको घुइँचो लागेको छ ।
तिथि वृद्धि हुँदा आज पनि महाअष्टमी मानेर यहाँका गुह्येश्वरी, मैतीदेवी, कालिकास्थान, नक्साल भगवती, भद्रकाली, शोभा भगवती, विजेश्वरी, इन्द्रायणी, रक्तकाली, श्वेतकाली, चामुण्डामाई, सुन्दरीमाई, बज्रयोगिनी, तलेजु भवानी, टोखा चण्डेश्वरीलगायत शक्तिपीठ एवं देवी मन्दिरमा पूजार्चना गर्ने भक्तजनको भीड लागेको हो । ती शक्तिपीठ तथा देवी मन्दिर ध्वजापताकाले सिँगारिएका छन् ।
रासस स्थानीय समाचारदाताहरूका अनुसार काठमाण्डू उपत्यका नजिकैको दक्षिणकाली, गोरखाको मनकामना, ताप्लेजुङको पाथीभरा, ललितपुरको बगलामुखी, पोखराको विन्ध्यवासिनी, काभ्रेपलाञ्चोकको पलाञ्चोक भगवती, जुम्लाको चन्दननाथ, डोटीको शैलेश्वरी, डडेलधुराको उग्रतारा भगवती, बैतडीको त्रिपुरासुन्दरी, नेपालगञ्जको वागीश्वरी, सप्तरीको छिन्नमस्ता भगवती र राजदेवी, धनकुटाको जाल्पादेवी, धरानको दन्तकाली तथा बाराको गढीमाईमा बिहानैदेखि भक्तजनको भीड लागेको छ ।
शारदीय नवरात्र समेत भनिने यस अवसरमा शक्तिपीठमा दर्शन गरेमा मनोकामना पूरा हुने धार्मिक विश्वास छ । यस अवसरमा महाकाली, महालक्ष्मी र महासरस्वतीको पनि विशेष रुपमा पूजा आराधना गरिन्छ । रासस
