रूसी राष्ट्रपति पुटिनको चीन भ्रमणको कार्यक्रम सार्वजनिक

मस्को । रूसी राष्ट्रपति भ्लादिमिर पुटिनको चीनको दुई दिने भ्रमणको कार्यक्रम मे १९-२० सम्मलाई तय भएको क्रेमलिनले शनिबार जनाएको छ ।

भ्रमणका क्रममा रूसी राष्ट्रपति पुटिनले आफ्ना चिनियाँ समकक्षी सी चिनफिङसँग भेटी मस्को र पैचिङबिचको साझेदारी र रणनीतिक सहयोगलाई कसरी अझै सुदृढ पार्ने भन्ने बारे छलफल गर्ने क्रेमलिनले विज्ञप्ति मार्फत जनाएको छ ।

पुटिन र सीले प्रमुख अन्तर्राष्ट्रिय र क्षेत्रीय सवालमा पनि विचार आदान-प्रदान गर्ने र वार्तापछि संयुक्त घोषणापत्रमा हस्ताक्षर गर्ने कार्यक्रम रहेको जनाइएको छ । भ्रमणका क्रममा पुटिनले चिनियाँ प्रधानमन्त्री ली छ्याङसँग पनि आर्थिक तथा व्यापारिक सहयोगबारे छलफल गर्ने कार्यक्रम तथा भएको जनाइएको छ । अमेरिकी राष्ट्रपति ट्रम्पको पहिलो चीन भ्रमण शुक्रबार सम्पन्न भएपछि पुटिनको भ्रमणको घोषणा भएको जनाइएको छ । भ्रमणले युक्रेन-रूस द्वन्द्व लगायत व्यापार र भू-राजनीतिक तनाव कम गर्न भूमिका निर्वाह गर्ने अपेक्षा गरिएको छ ।

चीनले युद्व अन्त्य गर्न नियमित रूपमा वार्ताको आह्वान गर्दै आफूलाई तटस्थ पक्षको रूपमा प्रस्तुत गरेको जनाएको छ । पैचिङले मस्कोलाई रक्षा उद्योगका लागि हतियार र सैन्य सामाग्री प्रदान गरेको कुरा अस्वीकार गर्दै पश्चिमी देशलाई युक्रेनलाई हतियार दिएर द्वन्द्व लामो बनाएको आरोप लगाएको छ । द्वन्द्वको विषयलाई लिएर रूसमाथि लगाएको आर्थिक प्रतिबन्धको बिचमा रूसी जीवाश्म इन्धनको विश्वको शीर्ष खरिद कर्ताको रूपमा, चीन मस्कोको प्रमुख आर्थिक साझेदार बनेको जनाइएको छ । रासस