प्रेस सङ्गठन नेपालको भेलालाई नेता नेपालको सम्बोधन, ओली सरकार कामचलाउ हुन पुगेको भनाई
काठमाडौं, २०७७ माघ ६ गते मंगलबार
नेपाल कम्युनिस्ट पार्टी (नेकपा) को दाहाल-नेपाल समूहका अर्का अध्यक्ष माधवकुमार नेपालले प्रतिनिधि सभा विघटनपछि प्रधानमन्त्री केपी शर्मा ओली कामचलाउ हुन पुगेको बताउनुभएको छ ।
मङ्गलवार आफू निकट पत्रकारहरुको सङ्गठन प्रेस सङ्गठन नेपालको दोस्रो राष्ट्रिय भेलालाई सम्बोधन गर्दै नेता नेपालले यस्तो बताउनुभएको हो ।
प्रतिनिधि सभा सदस्य नै प्रधानमन्त्री हुने भन्दै उहाँले ओलीले कि कामचलाउ भन्नुपर्ने कि कुर्सी छोड्नुपर्ने बताउनुभयो ।
अध्यक्ष नेपालले आफू प्रचण्डको कार्यकर्ता भनि ओलीले गरेको टिप्पणीको जवाफ दिँदै ओरिजिनल एमाले केपी ओली नभइ आफू भएको जिकिर गर्नुभयो । एकीकरणपछि एमाले तथा माओवादी पार्टी इतिहास भइसकेको भन्दै उहाँले अब ती पार्टी नबिउँतिने बताउनुभयो ।
अध्यक्ष नेपालले लोकतन्त्र, गणतन्त्र, सङ्घीयता, संविधानलगायतका राजनीतिक परिवर्तनहरु सङ्कटमा परेको भन्दै गलत कामको विरुद्ध उभिनुपर्ने बताउनुभयो ।
गएकाे पुस ५ गते प्रतिनिधि सभा विघटन भएयता सत्तारुढ नेकपा नै दुई समूहमा विभाजित भएकाे छ । प्रतिनिधि सभा विघटनविरुद्ध परेका रिटमाथि सुनुवाइ भइरहेकाे छ ।
प्रधानमन्त्री केपी शर्मा ओलीले प्रतिनिधिसभा विघटन गरेपछि प्रेस संगठन पनि विभाजित भएको छ । ओली पक्षले पनि बिहीबारका लागि भेला बोलाएको छ ।
