अख्तियारका पूर्व प्रमुख आयुक्त बस्न्यात भ्रष्टाचारको अभियोगमा जेल चलान

काठमाडौं, २०७७ मंसिर २९ गते सोमबार

अख्तियार दुरुपयोग अनुसन्धान आयोगका पूर्व प्रमुख आयुक्त दीप बस्न्यात भ्रष्टाचार अभियोगमा जेल चलान हुनुभएको छ । बालुवाटारको सरकारी जग्गा हिनामिना प्रकरणमा उहाँलाई विशेष अदालतले आईतबार पुर्पक्षका लागि थुनामा पठाएको हो । बस्न्यात डिल्लीबजार कारागार चलान हुनुभएको छ । मुद्धा दायर भएको दश महिनापछि बस्न्यात वरिष्ट अधिवक्ता सहित विशेष अदालतमा उपस्थित हनुभएको थियो ।

विशेष अदालतका अध्यक्ष प्रेमराज कार्की तथा सदस्यद्वय अब्दुल अजिज मुसलमान र नित्यानन्द पाण्डेयको इजलासले बस्न्यातलाई पुर्पक्षका लागि थुनामा पठाउने आदेश गरेको विशेष अदालतका उपरजिष्टार तथा प्रवत्ता पुष्पराज पाण्डेले बताउनु भयो । तत्काल प्राप्त प्रमाणका आधारमा थुनामा पठाइ मुद्दाको बाँकी प्रक्रियामा सहभागी गराउन अदालतको आदेश भएको पाण्डेले बताउनुभयो । विशेषको थुनछेक आदेश उपर चित्त नबुझे बस्न्यातले सर्वोच्चमा निवेदन दिन पाउनु हुनेछ ।

अदालतमा उपस्थित हुनुभएका बस्न्यातले आफूमाथिको अभियोग स्वीकार समेत गर्नुभएको छ । आफैँले हस्ताक्षर गरेर प्रस्ताव तयार पारेको उहाँले स्वीकार गर्नुभएको छ । यस्तै, नक्कली जग्गाधनी र मोही खडा गरेकोलाई अदालतले थुनामा पठाउने प्रमुख आधार लिएको छ । बस्न्यातमाथि अख्तियारले सरकारी सम्पत्ति व्यक्तिको नाममा दर्ता गर्न भूमिका निर्वाह गरेको, बदनियतपूर्ण लिखत तयार पारेको लगायतका आरोप लगाइएको छ । तत्कालीन भौतिक पूर्वाधार तथा यातायात मन्त्रालयको सचिव रहँदा बस्न्यातले मोहीका नाममा जग्गा कायम गर्नेगरि प्रस्ताव लगेको अभियोग अख्तियारले लगाएको छ । दोषी ठहर भएमा बस्न्यातमाथि सरकारी सम्पत्ति व्यक्तिका नाममा दर्ता गर्न सहयोग गरेको, गलत लिखत तयार पारेकोमा सजाय हुनेछ । साथै सार्वजनिक पद धारण गरेको व्यक्तिका हैसियतमा थप सजाय पनि हुनेछ ।

ललिता निवास प्रकरणमा अख्तियारले २०७६ माघ २२ गते १७५ जनाविरुद्ध मुद्दा दायर गरेको थियो । जसमा ६५ जनालाई जग्गा जफतको हकमा मात्र विपक्षी बनाइएको छ । बस्न्यातविरुद्ध अख्तियारले ९ करोड ६५ लाख ७६ हजार रुपियाँ बिगो कायम गरेको छ ।

प्रकरणका आरोपितमध्ये पहिलो पटक अदालतमा उपस्थित हुनुभएका तत्कालीन शाखा अधिकृत कृष्णप्रसाद पौडेललाई गत चैत ३ गते विशेषले थुनामा राख्ने आदेश गरेको थियो । लगत्तै सर्वोच्चले र्पौडेललाई दुई लाख रुपियाँ धरौटीमा रिहाको आदेश गरेको थियो । त्यसपछि उपस्थित भएका सबैलाई अदालतले धरौटी तथा साधरण तारेखमा रिहाको आदेश गरेको थियो ।