नेकपा (एकीकृत समाजवादी)को महाधिवेशन २०८१ जेठमा
काठमाण्डू, २०८० मंसिर १९ गते मंगलबार । नेकपा (एकीकृत समाजवादी)ले पार्टीको राष्ट्रिय महाधिवेशन आगामी २०८१ साल जेठमा मात्रै गर्ने भएको छ ।
आज काठमाण्डूमा बसेको पार्टी केन्द्रिय सचिवालय बैठकले माघको १४ र १५ गतेका लागि तय गरेको पार्टीको राष्ट्रिय महाधिवेशन २०८१ साल जेठ ३ देखि ७ गतेसम्म गर्ने निर्णय गरेको हो । पार्टीको महाधिवेशन जेठको पहिलो साता काठमाडौंमा हुनेगरी मिति सारिएको पार्टीका उपमहासचिव डा.गंगालाल तुलाधरले जानकारी दिनुभयो ।
त्यसैगरी बैठकले पार्टीको महाधिवेशनमा प्रस्तुत हुने प्रतिवेदनहरुको मस्यौदा तयार पार्नका लागि अध्यक्ष माधवकुमार नेपाल नेतृत्वको २७ सदस्यीय मस्यौदा कमिटी पनि बनाएको छ । पार्टीका पदाधिकारीसहितका नेताहरुलाई सो मस्यौदा कमिटीमा राखिएको पनि तुलाधरले बताउनु भयो । नेकपा एसले माघ १४ र १५ गते पार्टीको राष्ट्रिय सम्मेलन गर्ने भएको छ ।
बैठकले सो सम्मेलनका लागि विधानको व्यवस्था गर्न पार्टीका उपाध्यक्ष तथा संगठन विभाग प्रमुख वेदुराम भुसालको नेतृत्वमा महासचिव घनश्याम भुसाल र उपमहासचिव प्रकाश ज्वाला सदस्य रहनुभएको कार्यदल पनि गठन गरेको छ ।
त्यसैगरी सो राष्ट्रिय सम्मेलनको व्यवस्थापनका लागि उपमहासचिव गंगालाल तुलाधरको नेतृत्वमा अर्को एउटा कमिटी पनि बनाइएको छ । मंसिरको २८ र २९ गते पुनः सचिवालयको बैठक पनि बोलाउने निर्णय गरिएको छ । आगामी पुस ९ गते स्थायी कमिटी, १० गते पोलिटव्युरो साथै ११ र १२ गते केन्द्रिय कमिटीको बैठक बसी राष्ट्रिय महाधिवेशन र राष्ट्रिय सम्मेलनमा प्रस्तुुत हुने एजेण्डाबारे छलफल गर्ने निर्णय पनि बैठकले गरेको उपमहासचिव तुलाधरले जानकारी दिनुुभयो ।
सचिवालय बैठकले राष्ट्रिय सभा निर्वाचनका लागि दल दर्ता गर्ने निर्णय पनि गरेको छ । रासस
