चीनको व्यापार बचत नौ महिनामै ९३८ अर्ब डलर, निर्यात ३६.३ प्रतिशतले बढ्यो

• सन् २०२६ को पहिलो नौ महिनामा चीनको व्यापार बचत ९३८ अर्ब डलर ।
• सेप्टेम्बरमा निर्यात ३६.३ प्रतिशत र आयात ३१ प्रतिशतले वृद्धि ।
• बढ्दो व्यापार बचतले अमेरिका र युरोपेली सङ्घसँग तनाव बढ्ने जोखिम ।

हङकङ । चीनको व्यापार बचत सन् २०२६ को पहिलो नौ महिनामा ९३८ अर्ब अमेरिकी डलर पुगेको छ । सेप्टेम्बरमा निर्यात ३६.३ प्रतिशतले बढेपछि गत वर्ष कायम १२ खर्ब डलरको कीर्तिमानी व्यापार बचत उछिन्ने सम्भावना बढेको छ ।

चिनियाँ भन्सार निकायका अनुसार सेप्टेम्बरमा आयात ३१ प्रतिशतले बढेको छ । यससँगै चीनको मासिक व्यापार बचत अगस्टको ११९.१ अर्ब डलरबाट बढेर १३३.५ अर्ब डलर पुगेको छ ।

जनवरीदेखि सेप्टेम्बरसम्म अर्धचालकको निर्यात १०८.१ प्रतिशतले बढेको छ । तथ्याङ्क प्रशोधन उपकरण तथा पार्टपुर्जाको निर्यात ५४.६ प्रतिशत र सवारीसाधनको निर्यात ५४.३ प्रतिशतले वृद्धि भएको छ ।

निर्यात वृद्धिले घरेलु उपभोग र लगानी सुस्त रहेको चीनको अर्थतन्त्रलाई सहयोग गरेको छ । तर घरजग्गा क्षेत्रको मन्दी अझै चुनौती बनेको छ ।

चीनले सन् २०२६ मा ४.५ देखि पाँच प्रतिशत आर्थिक वृद्धि गर्ने लक्ष्य राखेको छ । तर अन्तर्राष्ट्रिय मुद्रा कोषले चीनको आर्थिक वृद्धिको अनुमान घटाएर ४.५ प्रतिशतमा झारेको छ ।

चीनको बढ्दो व्यापार बचतले अमेरिका र युरोपेली सङ्घ (इयु) सँग तनाव बढाउने जोखिम छ । इयुले चीनसँगको दैनिक एक अर्ब १० करोड डलरभन्दा बढीको व्यापार घाटा घटाउने प्रयास गरिरहेको छ ।

इयुका व्यापार प्रमुख मारोस सेफकोभिचले आगामी केही वर्षमा चीनबाट हुने हाइब्रिड कारको आयात आधा गर्ने विषयमा सहमति भएको बताउनुभएको थियो ।

विश्लेषकहरूका अनुसार कमजोर युआनले चिनियाँ सामानलाई सस्तो बनाउन सहयोग गरेको छ । तर पश्चिमी बजारमा व्यापारिक दबाब बढिरहेको छ । दक्षिणपूर्वी एसिया र ल्याटिन अमेरिकामा निर्यात विस्तार भए पनि त्यसले पश्चिमी बजारको मागलाई पूर्ण रूपमा प्रतिस्थापन गर्न नसक्ने उनीहरूको भनाइ छ ।

विश्वव्यापी कृत्रिम बौद्धिकता (एआई) क्षेत्रमा लगानी सुस्त भए चीनको उच्च प्रविधियुक्त सामानको निर्यातमा समेत असर पर्न सक्ने अर्थशास्त्री म्याक्स जेङ्गलेनले बताउनुभएको छ ।

चीनले घरेलु माग बढाउन घर खरिदकर्ताको धितो ऋणको ब्याजमा अनुदान दिने लगायतका उपाय अघि सारेको छ । तर आन्तरिक माग सुदृढ पार्नु अझै चुनौती बनेको छ ।

चीनले आगामी साता जुलाईदेखि सेप्टेम्बरसम्मको त्रैमासिक आर्थिक वृद्धिदर सार्वजनिक गर्ने तयारी गरेको छ । एपी