पुस्तक विक्री कक्षको समुद्घाटन
![](https://voiceofkathmandu.com/wp-content/uploads/2020/12/Pustak..jpg)
काठमाडौं, २०७७ मंसिर ३० गते मंगलबार
नेपाल प्रज्ञा-प्रतिष्ठानद्वारा प्रकाशित पुस्तक तथा पत्रपत्रिकाहरूको विक्री वितरणका लागि नयाँ विक्री कक्षको स्थापना गरिएको छ ।
प्रतिष्ठानले प्रकाशन गरेका पुस्तकहरूको अधिकृत विक्रेताको जिम्मा पाएको मकालु प्रकाशन गृहले कमलादीस्थित प्रतिष्ठान परिसरमै स्तरीय विक्री कक्ष सञ्चालनमा ल्याएको हो । उक्त विक्री कक्षको सोमबार संस्कृति, पर्यटन तथा नागरिक उड्डयन मन्त्री योगेश भट्टराईले उद्घाटन गर्नुभयो ।
प्रतिष्ठानद्वारा प्रकाशित पुस्तकहरूलाई सातै प्रदेशमा विक्री वितरणको व्यवस्था मिलाउनका लागि प्रतिष्ठानले अधिकृत विक्रेता हुन चाहने प्रकाशक तथा वितरकबाट बोलपत्र आह्वान गरेकोमा मकालु प्रकाशन गृह छनोट भएको थियो । आफ्ना स्थानीय विक्रेतामार्पmत प्रतिष्ठानद्वारा प्रकाशित कृतिलाई सातै प्रदेशमा विक्री वितरणको व्यवस्था मिलाइएको मकालु प्रकाशन गृहले जनाएको छ ।
सङ्घीय राजधानी रहेको काठमाडौँमा पाठक सङ्ख्या पनि धेरै हुने भएकाले पाठकको सुविधालाई ध्यानमा राखी उक्त विक्री कक्ष सञ्चालनमा ल्याइएको प्रकाशन गृहका कार्यकारी निर्देशक वासुदेव ढकालले जानकारी दिनुभयो । ढकालका अनुसार विक्री कक्षमा मकालु प्रकाशन गृह र सोपानद्वारा प्रकाशित पुस्तकका अतिरिक्त चल्तीमा रहेका विभिन्न स्वदेशी तथा विदेशी गरी करिब तीन हजार शीर्षकका पुस्तक विक्रीका लागि राखिएका छन् ।
बालसाहित्य सम्बन्धी पुस्तक पढ्न बालबालिकाका लागि छुट्टै डेस्कको व्यवस्था गरिएको र खुला ठाउँमा बसेर पुस्तक छनोट गर्न सकिने अवसर पाठकलाई रहेको उक्त विक्री कक्षमा पाइने पुस्तक विश्वको जुनसुकै कुनाबाट पनि मगाउन सकिने मकालु प्रकाशन गृहका प्रबन्ध निर्देशक राजेन्द्र ढकालले जानकारी दिनुभयो ।