रारा पर्यटन पदमार्ग, साइकल लेन अलपत्र

मुगु, २०८१ फागुन १० गते शनिबार । कर्णाली प्रदेशकै प्रमुख पर्यटकीय गन्तव्य रारातालमा निर्माणाधीन रारा पर्यटन पदमार्गको निर्माणकार्य अलपत्र परेको छ ।

खानी थोदुङ क्याराभान कन्ट्रक्सन प्रालिले निर्माणको जिम्मा पाएको उक्त आयोजना निर्माण कम्पनीकोे लापरवाहीले अलपत्र परेको हो । डिभिजन वन कार्यालय मुगुका निमित्त कार्यालय प्रमुख गोविन्द्र महतका अनुसार रारा पर्यटकीय पदमार्ग निर्माणका लागि सङ्घीय सरकार र कर्णाली प्रदेशको वन तथा वातावरण मन्त्रालयअन्तर्गत आर्थिक वर्ष २०७८-७९ को बजेटमा ४५ करोड २९ लाख १० हजार ७९ रुपियाँमा खानी थोदुुङ क्याराभानले २०७९ असारमा निर्माणको जिम्मा पाएको थियो ।

१४ किलोमिटर लामो पदमार्गमा पूर्वाधार निर्माण हुन नसक्दा पर्यटकलाई आउजाउमा समस्या भएको स्थानीयबासीको भनाई रहेको छ । निर्माण कम्पनी जेविका सहायक सञ्चालक ध्रुव शाहीले रारामा चिसोको कारणले काम गर्न नसकिएको जानकारी दिनुभयो । शङ्कर मालिका कन्स्ट्रक्सन प्रालिले जिम्मा पाएको रारा पर्यटकीय पूर्वाधार साइकल लेनको निर्माणकार्य २०७७ सालदेखि अलपत्र छ । डिभिजन वन कार्यालयसँग सम्झौता भएको कार्यालय प्रमुख महतले जानकारी दिनुभयो । निर्माण कम्पनीले काम सञ्चालन गर्नलाई पहिलो किस्ता १ करोड रुपियाँ पेश्की लिएको देखिन्छ ।

छायाँनाथ रारा नगरपालिका-९ का स्थानीय समाजसेवी बिर्खबहादुर रोकायाका अनुसार रारा साइकल लेन निर्माणकार्यका लागि ल्याइएका गैर स्थानीय सामग्री इँटा, कंक्रिट यत्रतत्र फालिएका छन् । निर्माण कम्पनीको लापरवाहीका कारण काम अगाडि बढ्न नसकेको उहाँको भनाइ छ । डिभिजन वन कार्यालय मुगुका कार्यालय प्रमुुख गोविन्द महतले बहुवर्षीय योजना भएकोले २०८२ सालसम्म सक्नुपर्ने भए पनि आजसम्म ठेक्का कम्पनीको लापरबाहीले काम अगाडि नबढेको र निर्माण कम्पनी पनि अहिलेसम्म सम्पर्कमा नआएको बताउनुभयो ।

रारा राष्ट्रिय निकुञ्जका कार्यालय प्रमुख महेश न्यौपानेका अनुसार रारा राष्ट्रिय निकुञ्जभित्र पर्यटकीय पूर्वाधार निर्माण कार्यमा छिटोछरितो काम नभएको बताउनुहुन्छ । रारामा पर्यटकीय पूर्वाधार निर्माण समयमै सम्पन्न नहुँदा रारा घुम्न आउने पर्यटकलाई असहज भएको उहाँले गुनासो सुनाउनुभयो । सम्बन्धित निकायले पर्यटन पूर्वाधार समयमै सम्पन्न गरेमा रारा तालको आकर्षणले पर्यटक पनि भविष्यमा बढ्ने उहाँको भनाइ छ । रासस