तमु ल्होछार देशैभर भव्य रुपमा मनाईयो

भिओके समाचार/काठमाण्डू, २०८१ पुस १५ गते सोमबार । गुरुङ समुदायको महत्वपूर्ण पर्व ल्होछार आज विभिन्न कार्यक्रमहरुको आयोजना गरी देशैभर भव्य रुपमा मानाईएको छ । गुरुङ समुदायले नयाँ वर्षको रुपमा मनाउने यस पर्वमा सहभागी हुन बिहानैदेखि सो समुदायका मानिसहरु विभिन्न चौक, गल्लि र सडकहरुमा परम्परागत पोशाकमा सजिएका देखिएका थिए ।

धार्मिक तथा सांस्कृतिक कथन अनुसार ‘ल्हो’को अर्थ वर्ष र ‘छार’ को अर्थ फेरिनु भएकाले वर्ष फेरिने दिनलाई ‘तमु ल्होछार’ भनिएको हो । तमु ल्होछार गुरुङ समुदायले नयाँ वर्षका रुपमा भव्य रुपमा मनाउने गर्दछन् । ‘तमु ल्होछार’ पर्वको अवसरमा काठमाण्डूको टुँडिखेलमा समेत भव्य समारोहको आयोजना गरिएको थियो । सो समारोहमा गुरुङ समुदायका विभिन्न सांस्कृतिक पहिरन सहित संस्कृति दर्शाइएको थियो ।

तमु ल्होछार सूर्यको किरणसँग सम्बन्धित पर्व हो । पुस १५ गतेको रात सबैभन्दा लामो हुने र यसपछिका रात घट्दै जाने भएकाले पनि यस पर्वको महत्व रहेको छ ।

तमु ल्होछारका अवसरमा आज सरकारले सार्वजनिक बिदा समेत दिएको थियो । गुरुङ बाहुल्य जिल्ला खासगरी लमजुङ, गोरखा, तनहुँ, स्याङ्जा, मनाङ, कास्की, पर्वतलगायतमा तमु ल्होछार सांस्कृतिक झाँकीसहित भव्यताका साथ मनाउने गरिन्छ ।

तमु ल्होछारको अवसरमा राष्ट्रपति रामचन्द्र पौडेल, उपराष्ट्रपति रासहायप्रसाद यादव, प्रधानमन्त्री केपी शर्मा ओली लगायत विभिन्न दलका नेताले देश विदेशमा बसोबास गर्ने सम्पूर्ण गुरुङ समुदायलाई शुभकामना दिनुभएको छ ।