भारतीय सञ्चारमाध्यममा प्रसारित अनर्गल प्रलापविरुद्ध ग्रेटर नेपाल राष्ट्रवादी मोर्चाको प्रेसविज्ञप्ति
काठमाडौं, २०७७ असार २६ गते शुक्रबार
ग्रेटर नेपाल राष्ट्रवादी मोर्चाले प्रधानमन्त्री केपी शर्मा ओली र नेपालका लागि महामहिम चिनियाँ राजदूत विरुद्ध भारतीय सञ्चारमाध्यममा प्रसारित अनर्गल प्रलापविरुद्ध प्रेसविज्ञप्ति जारी गर्दै विरोध जनाएको छ ।
मोर्चाद्वारा शुक्रबार जारी विज्ञप्तिमा भनिएको छ -“प्रधानमन्त्री केपी शर्मा ओलीसँग ग्रेटर नेपाल राष्ट्रवादी मोर्चाका अनेक असहमति छन्, तर नेपालका प्रधानमन्त्रीमाथि इन्डियाली सञ्चारजगतले जुन निकृष्ट शैलीको प्रदर्शनबाट चरित्रहत्या गर्न खोजेको छ, ग्रेटर नेपाल राष्ट्रवादी मोर्चा त्यसको घोर भर्त्सना र निन्दा गर्दछ । यसका साथै नेपालका लागि महामहिम चिनियाँ राजदूतको कूटनीतिक मर्यादामाथि हिलो छ्यापेर पीत र वेश्या शैलीमा नयाँ दिल्लीले गरिरहेको नग्ननृत्यले `हग्नेलाई भन्दा देख्नेलाई लाज ´ भन्ने नेपाली उखान चरितार्थ गर्नु उत्तिकै निन्दनीय रहेको छ ।”
विज्ञप्तिमा केही दिनयता इन्डियाका सञ्चारमाध्यमले नेपाल र नेपालका प्रधानमन्त्रीले उठाएका राष्ट्रियतासँग सम्बन्धित नक्सासंशोधन र नागरिकतालगायतका साहसिक कदमले सिर्जना गरेको राष्ट्रिय तरङ्गबाट विक्षिप्त भएर पत्रकारिताको सामान्य आचारसंहिता पनि पालना नगरेको देखिएको छ , त्यो इन्डिया सरकारकै सहमतिमा भएको हो भन्न बाध्य हुनुपर्छ भनिएको छ ।
मोर्चाका अध्यक्ष फणीन्द्र नेपालद्वारा हस्ताक्षरित विज्ञप्तिमा नेपाल र इन्डियाबीचको सम्बन्धका विविध र वृहत्तर आयामलाई इन्डिया आफैंले सङ्कुचित गर्न चाहेको प्रमाणित भएको सन्दर्भमा ग्रेटर नेपाल राष्ट्रवादी मोर्चा नेपालका परराष्ट्र मन्त्रालय र सूचना तथा सञ्चार मन्त्रालयले नेपालका लागि इन्डियाली राजदूतलाई बोलाएर तत्काल विरोधपत्र दिनुपर्छ भन्ने जोडदार माग गर्दछ भनिएको छ ।
