टानको अध्यक्षमा पाण्डे निर्वाचित, अन्य परिणाम मिश्रित
भिओके समाचार/काठमाण्डू, २०८१ भदौ १८ गते मंगलबार । ट्रेकिङ एजेन्सिज एशोसिएसन अफ नेपाल (टान)को अध्यक्ष पदमा सागर पाण्डे निर्वाचित हुनुभएको छ । पदयात्रा (ट्रेकिङ) व्यवसायीहरूको छाता संस्था (टान) को सोमबार सम्पन्न ४६औँ वार्षिक साधारणसभा तथा निर्वाचनमा उहाँले अध्यक्षका प्रत्यासी राजेन्द्रप्रसाद सापकोटालाई पराजित गर्नुभएको थियो । अध्यक्ष पदका प्रत्याशी राजेन्द्र प्रसाद सापकोटालाई पराजित गर्दै पाण्डे निर्वाचित हुनुभएको हो । पाण्डेले ५ सय ८० मत प्राप्त गर्नुभएको छ भने सापकोटाले ४ सय ८० मत प्राप्त गर्नुभएको छ ।
गोरखा अस्राङका नवनिर्वाचित अध्यक्ष पाण्डे विगत तीन दशकदेखि नेपालको पर्वतीय पर्यटन व्यवसायमा आबद्ध हुनुहुन्छ । उहाँ हिमालयन ग्लासियर ट्रेकिङ कम्पनीको संस्थापकसमेत हुनुहुन्छ ।
वरिष्ठ उपाध्यक्षमा कर्मा शेर्पा (५५८), प्रथम उपाध्यक्षमा विष्णुप्रसाद लम्साल(५३५), द्वितीय उपाध्यक्षमा सनम शेर्पा (५४४) र महासचिवमा सोनाम ग्याल्जेन शेर्पा (५५० मत प्राप्त) विजयी हुनुभएको छ ।
यस्तै, सचिव पदमा रिञ्जीजाङबु शेर्पा, कोषाध्यक्षमा गौतमराज वाग्ले र सहकोषाध्यक्षमा लाक्पा तेम्बा शेर्पा निर्वाचित हुनुभयो । महिला सदस्यमा पवित्रा तामाङ, सदस्यमा अम्बिरबहादुर गुरुङ, विनोदकुमार तामाङ, होमबहादुर विश्वकर्मा, फुर्पुछिरिङ ल्होमी (भोटे), विकास गुरुङ, सागर राई, छाप्ते लामा र राजु गुरुङ निर्वाचित हुनुभएको छ ।
विजयी भएसँगै सञ्चारकर्मीसँग कुरा गर्दै नवनिर्वाचित अध्यक्ष पाण्डेले टानमा आबद्ध व्यवसायी र मजदुरका लागि ‘टान बृहद् अक्षयकोष’ निर्माण गर्ने बताउनुभयो । उहाँले पर्यटन व्यवसायमा कायम भ्याट छुटका निम्ति विशेष पहल गर्ने, ट्रेकिङ कम्पनीमार्फत मात्र पदयात्रामा जाने बाध्यात्मक व्यवस्था मिलाइने, टिम्स व्यवस्थापनलाई मुख्य प्राथमिकतामा राखिने, नियन्त्रित पदमार्गको परमिटमा सहजीकरण गर्ने, करसम्बन्धी समस्या समाधान गर्ने बताउनुभएको छ ।
