सुरभि साहित्य प्रतिष्ठानले चार कथाकारलाई पुरस्कृत गर्ने
![](https://voiceofkathmandu.com/wp-content/uploads/2024/07/suravi-puraskar.jpg)
काठमाण्डू, २०८१ साउन १० गते बिहीबार । सुरभि साहित्य प्रतिष्ठानले चार पुरस्कारको घोषणा गरेको छ । चार कथाकारलाई नगद रु १० हजारसहित पुरस्कार प्रदान गर्ने घोषणा गरिएको प्रतिष्ठानका अध्यक्ष बाजुरामप्रसाद पौडेलले जानकारी दिनुभयो ।
पुरस्कारका लागि प्रतिभा छनौट समितिबाट सिफारिस भई आएबमोजिम सुरभि-अच्युतराम लघुकथा पुरस्कार नेपाल स्रष्टा समाजका अध्यक्ष एवम् लघुकथा समाज र ललितपुर कला संस्कृति प्रतिष्ठानका अध्यक्ष श्रीओम श्रेष्ठ ‘रोदन’, सुरभि-प्रह्लाद नारी आख्यान पुरस्कार वरिष्ठ कथाकार हिरण्यकुमारी पाठकलाई प्रदान गरिने निर्णय भएको उहाँले बताउनुभयो ।
यसैगरी, सुलेख आख्यान प्रतिभा पुरस्कार आख्यानकार विद्याप्रसाद घिमिरे र सुरभि-वेदमणि आख्यान प्रतिभा पुरस्कार आख्यानकार रामचन्द्र दाहाललाई प्रदान गरिने भएको छ । पुरस्कारका लागि प्रतिभा छनौट तथा मूल्याङ्कन समितिमा संयोजक गोपी मैनाली र सदस्यद्वयमा ठाकुर शर्मा भण्डारी र सुरभि साहित्य प्रतिष्ठानका अध्यक्ष बाजुरामप्रसाद पौडेल हुनुहुन्थ्यो । साउनको तेस्रो शनिबार १९ गते प्रतिष्ठानको सोह्रौँ साधारण-सभाका दिन चारै जना स्रष्टालाई पुरस्कार प्रदान गरिने भएको छ । रासस