गोँगबु घटनाका दोषीलाई कारबाही गर्न सांसदको माग
काठमाण्डू, २०७९ फागुन ३ गते बुधबार । प्रतिनिधिसभाको आजको बैठकमा सांसदहरुले यही फागुन १ गते काठमाण्डूको बालाजुमा भएको चोरी र लुटपाटको घटनाको यथार्थ छानबिन गरी दोषीलाई कडा कारबाही गर्न सरकारसँग माग गर्नुभएको छ ।
प्रतिनिधिसभा बैठकको आजको शून्य समयमा बोल्दै उहाँहरुले चुस्त सुरक्षाको व्यवस्था गर्नसमेत सभामुखमार्फत सरकारको ध्यानाकर्षण गराउनुभएको छ । बैठकमा सांसद सूर्य थापाले बालाजुमा भएको घटनाको यथार्थ विवरण संसद्लाई जानकारी गराउन सरकारको ध्यानाकर्षण गराउनुभयो । उहाँले काठमाडौँको मुटुमा भएको उक्त घटनाका बारेमा सरकार मौन बस्न नमिल्ने बताउनुभयो ।
सांसद विराजभक्त श्रेष्ठले काठमाण्डूको गोँगबु बसपार्कमा भएको अमानवीय लुटपाटको घटनाका दोषीलाई कडा कारबाही गर्दै पीडितलाई क्षतिपूर्ति दिन आग्रह गर्नुभयो । सांसद शिशिर खनालले मजदुर आन्दोलनको नाममा गोँगबु बसपार्कमा भएको लुटपाटमा संलग्न व्यक्तिहरुलाई कडा कारबाही गर्न सरकारको ध्यानाकर्षण गराउनुभयो ।
सांसद शङ्कर भण्डारीले गत फागुन १ गते गोँगबु बासपार्कमा व्यवसायीका सामान लुटपाटमा संलग्नलाई पक्राउ गरी दोषीलाई कारबाही गरेर पीडितलाई क्षतिपूर्ति दिन माग गर्नुभयो । सांसद ज्ञानबहादुर शाहीले काठमाडौँको गोँगबुको घटनाका बारेमा अवगत गराउँदै तत्काल चुस्त सुरक्षाको व्यवस्था प्रत्याभूत गर्न सरकारको ध्यानाकर्षण गराउनुभयो ।
सांसद ज्ञानु बस्नेत सुवेदीले किसानले आफ्नो उत्पादनको उचित मूल्य नपाएकोप्रति आवश्यक व्यवस्था गर्न माग गर्नुभयो । सांसद बनिताकुमारी सिंहले मधेसवासीको सुविधाका लागि निर्माण गरिएको हुलाकी राजमार्ग निर्माणमा ढिलाइ भएकोप्रति सरकारको ध्यानाकर्षण गराउनुभयो । सांसद विश्वप्रकाश शर्माले दैनिक आत्महत्या गर्ने क्रम वृद्धि हुँदै गएको हुँदा मानसिक समस्यालाई सम्बोधन गर्न र झन्झटिलो प्रशासनिक सेवालाई चुस्त बनाउनुपर्ने माग गर्नुभयो ।
सांसद शक्तिबहादुर बस्नेतले संविधानले आधारभूत स्वास्थ्य सेवा निःशुल्क हुने भनिएता पनि निःशुल्क पाइने भनिएका औषधि सरकारी अस्पतालबाट नपाएको हुनाले तत्काल व्यवस्था गर्न माग गर्नुभयो । सांसद शोभा ज्ञवालीले बर्दियामा बनेको पुल केही समयमै बिग्रिएको जानकारी गराउँदै तत्काल निर्माणका लागि सरकारको ध्यानाकर्षण गराउनुभयो ।
सांसद सरस्वती सुुब्बाले काठमाण्डू सुकुम्वासीलाई हटाउनुअघि उनीहरुको आवासको हकको सुनिश्चित गर्न माग गर्नुभयो । सांसद सरिता प्रसाईले किसानले अतिआवश्यक पर्ने मल र बीउ समयमा नपाएको अवस्था भएको हुनाले किसानको समस्याप्रति ध्यान दिन सरकारको ध्यानाकर्षण गराउनुभयो ।
सांसद सरिता भुसालले नवलपरासीका उखु किसानलाई लामो समयदेखि रकम भुक्तानी नगरिइएको जानकारी गराउँदै उक्त किसानलाई तत्काल भुक्तानी गर्न माग गर्नुभयो । सांसद शान्ति चौधरीले बर्दिया, कैलाली, कञ्चनपुरमा सोनाहा जातिलाई आदिवासी र अल्पसङ्ख्यक जातिमा सूचीकृत गर्न माग गर्नुभयो ।
सांसद सुमना श्रेष्ठले जनगणना भएको महिनौँ बितिसक्दा पनि त्यसको पूर्ण प्रतिवेदन सार्वजनिक नभएको हुँदा सरकारी नीति निर्माणमा कठिनाइ भएको भन्दै तत्काल सार्वजनिक गर्न माग गर्नुभयो ।
सांसद सुरेन्द्रराज आचार्यले कपिलवस्तुमा छाडा गाईगोरुका कारण कृषकलाई समस्या परेको जनाउँदै सम्बन्धित निकायको ध्यानाकर्षण गराउनुभयो । सांसद सोबिता गौतमले सुलभ कर्जा नपाउँदा धेरै मानिसलाई समस्या परेको हुनाले सरकारले त्यसतर्फ ध्यान दिनुपर्नेमा जोड दिनुभयो ।
सांसद हितराज पाण्डेले शान्ति प्रक्रियाका बाँकी रहेका काम अविलम्ब सम्पन्न गर्न सभामुखमार्फत सरकारको ध्यानाकर्षण गराउनुभयो । सांसद हेमराज राईले जनताको आर्थिक अवस्था सुधार गर्न प्राथमिकता दिन आग्रह गर्नुभयो ।
यसैगरी सांसद ज्ञानेन्द्रबहादुर कार्कीले सुनसरीको बराह मन्दिर क्षेत्रमा नदी कटानले समस्या हुँदै गएको जनाउँदै यसको संरक्षणको माग गर्नुभयो । सांसद सन्तोष चालिसेले शिवपुरी आरक्ष क्षेत्र भई गाउँबस्ती प्रवेश गर्दा शुल्क तिर्नुपर्ने अवस्थालाई हटाउन माग गर्नुभयो । रासस
